माउण्टेन रेसमा प्रथम हुनेलाई एक लाख १० हजार, सहभागीलाई पाँच लाखको बीमा

‘पाँचौ लिष्टिकोट दुगुनागढी माउण्टेन ट्रेल रेस, २०८१’ प्रतियोगिता हुने भएको छ । खेलकुद विकासमा टेवा पुर्याउन, सैनिक र नागरिकबीचको सम्बन्ध थप प्रगाढ बनाउन सिन्धुपाल्चोकस्थित नेपाली सेनाको ईन्द्रध्वज गण र भोटेकोशी गाउँपालिकाको आयोजनामा प्रतियोगिता सञ्चालन गर्न लागिएको छ ।

माघ २६ गते हुने २४.५ किलोमीटर लामो दौड तातोपानी भन्सार ड्राईपोर्ट हुँदै दुगुनागढी पुगेर टुँगिने छ । रेसमा नेपाली र विदेशी दुवै नागरिकले सहभागिता जनाउन सक्ने सेनाले जनाएको छ । 

सहभागी हुन इच्छुकलाई माघ १५ गतेसम्म नाम दर्ता गराउनसमेत आग्रह गरिएको छ । सैनिक केन्द्रीय पुस्तकालय, चौतारा, मेलम्ची, बाह्रबिसे, झिर्पुस्थित आर्मी ब्यारेकहरु र भोटेकोशी गाउँपालिकामा स्वयम् उपस्थित भई वा इमेल तथा फोनबाट पनि नाम दर्ता गराउन सकिनेछ । 

सेनाका अनुसार खुल्ला, महिला र भोटेकोशी गाउँपालिकातर्फ गरी प्रतियोगिता तीन विधामा हुनेछ । खुलातर्फ प्रथम हुनेले एक लाख १० हजार रुपैयाँ नगद पुुरस्कार पाउने छन् । दोस्रोले ७५ हजार र तेस्रोका लागि ५० हजार रुपैयाँ नगद पुरस्कार तोकिएको छ । 

महिलातर्फ पहिलो हुनेले ७० हजार, दोस्रो हुनेले ५० हजार र तेस्रो हुनेले ३० हजार रुपैयाँ नगद पुरस्कार पाउने छन् । भोटेकोशी पालिकाबासीतर्फ प्रथम हुनेलाई ३० हजार, दोस्रो हुनेलाई २० हजार र तेस्रो हुनेलाई १५ हजार रुपैयाँ नगद पुरस्कार तोकिएको छ ।

प्रतियोगितामा भाग लिने खेलाडीको दौड अवधिभरका लागि पाँच लाख रुपैयाँ बराबरको निःशुल्क दुर्घटना बीमाको व्यवस्था गरिएको छ ।