मीनबहादुर गुरुङलाई चुना लगाउन खोज्दा च्याप्पै

आन्तरिक राजस्व विभागको सफ्टवेयर ‘एकीकृत कर प्रणाली’ ह्याक गरेर करको दर हेरफेर गरेको आरोपमा दुई जना समातिएका छन् । 

पर्वतको बिहादी गाउँपलिका-३ का २८ वर्षीय सन्तोष पराजुली र गोरखाको भीमसेन थापा गाउँपालिका-४ का २२ वर्षीया परिन पाण्डेलाई प्रहरीले उक्त आरोपमा आज पक्राउ गरेको छ । हाल चितवनको भरतपुर महानगरपालिका-११ मा बस्दै आएका उनीहरुलाई ३ नम्बर वडाबाट नियन्त्रण लिइएको प्रहरीको केन्द्रीय अनुसन्धान ब्युरो (सिआइबी) ले जनाएको छ । 

सिआइबी प्रवक्ता सुथिर राज शाहीका अनुसार उनीहरुले राजस्व विभागको सफ्टवेयर ह्याक गरी भाटभटेनी सुपरमार्केटको युजर आइडी र पासवर्ड दुरुपयोग गरेर करको दर बढाएका थिए । मीनबहादुर गुरुङ मालिक रहेकाे भाटभटेनीले राजस्वको दायराभित्र रहेर गरेको दुई अर्ब ३४ करोड १६ लाख कारोबारको कर दायित्व ६ करोड २६ लाख ९४ हजार रहेकोमा उनीहरूले १३ करोड नौ लाख ५९ हजार बढी कर दायित्व देखाएको शाहीले बताए । 

सिष्टम ह्याक गर्न प्रयोग गरिएका ल्यापटप,सिपियु,वाइफाइ राउटर, डीभीआर र मोबाइल पनि प्रहरीले बरामद गरेको छ । दुवै जनालाई सात दिनको म्याद थप गरेर विद्युतीय कारोबार ऐन, ०६९ को परिच्छेद ९ को कसुरमा अनुसन्धान अघि बढाइएको प्रहरीले जनाएको छ ।