रंगशाला छोडेर कलाकारितामा फर्किएका धुर्मुस बने ‘हत्यारा मन्त्री’

चितवनमा निर्माणाधीन गौतम बुद्ध अन्तर्राष्ट्रिय क्रिकेट रंगशालाको लफडाले झण्डै करिअर समाप्त गरेका कलाकार हुन्,सीताराम कट्टेल उर्फ धुर्मुस । रंगशालाको प्रोजेक्टबाट हात झिकेका उनी पछिल्लो समय कलाकारितालाई लयमा ल्याउने प्रयास गरिरहेका छन् । 

यसैबीच उनी अभिनित चलचित्र ‘लाज शरणम्’काे नयाँ पोस्टर सार्वजनिक भएको छ । जहाँ उनको अवतारले लामो समयपछि दर्शकहरुलाई नयाँ स्वाद दिएको देखिन्छ । 

पोस्टरमा उनी जेलमा रहेका नेपाली कांग्रेसका नेता तथा पूर्वमन्त्री मोहम्मद आफताब आलमको भूमिकामा देखिएका छन् । स्मरण रहोस्, ०६४ चैत्र ७ गते रौतहटमा भएको एक बम विस्फोटमा घाइते भएकाहरुलाई जिउँदै इट्टाभट्टाको चिम्नीमा हालेर हत्या गरेकाे आरोपमा जिल्ला अदालतले गत बैशाखमा पूर्वमन्त्री आलम र उनका भाईसहित चार जनालाई जन्मकैदको सजाय सुनाएको थियो । 

यसरी एउटा हत्यारा प्रमाणित भएका नेताको भूमिकामा धुर्मुसको कमब्याकले धेरै दर्शकमा चलचित्रबारे कौतुहुलता र उत्सुकता पैदा गरेको देखिन्छ । यतिबेला सामाजिक सञ्जालमा दर्शकहरुले धुर्मुसको पोस्टर शेयर गर्दै विभिन्न प्रतिक्रिया दिइरहेका छन् । 

आगामी फागुन १४ गतेबाट प्रदर्शनमा आउन लागेको यस चलचित्रलाई धुर्मुसकै भाइ कुमार कट्टेल उर्फ जिग्रीले निर्देशन गरेका हुन् । टेलिसिरियल ‘सक्किगो नि’ बाट चर्चामा आएका जिग्री यतिबेला चलचित्रको प्रचार प्रसारमा व्यस्त छन् ।

दाजुभाइको यो पहिलो ठूलो सहकार्यसमेत हो । चलचित्रमा ‘पूर्णबहादुर सारंगी’ फेम्ड विजय बराल, अर्पण थापा, रेणु योगी, महेश त्रिपाठीलगायतको पनि अभिनय छ ।