चितवनमा साइकल चोर्दै, लुकाउँदै

रातिको समयमा शंकास्पद रुपमा साइकल चलाएर हिँडिरहेका दुइजना अन्ततः साइकल चोर भएको पत्ता लागेको छ ।

बिहीबार राति २ दुई बजेको समयमा चितवनको भरतपुर–७, बुद्धचोकस्थित सडकमा भरतपुर–१० का ३९ वर्षीय मनिष सुनार र ५७ वर्षीय उत्तम दुरा पक्राउ परेका हुन् । प्रहरीले रोकेर केरकार गर्दा उनीहरुले चढी आएको साइकलमात्रै चोरेर ल्याएको नभई अन्य स्थानमा समेत साइकल चोरेर लुकाएको स्वीकारेका छन् । 

उनीहरुले लुकाएको स्थान बताएपछि थप नौवटा साइकल बरामद भएको छ । चोरीका ११ वटा साइकलसहित नियन्त्रणमा लिइएका मनिष र उत्तमलाई अदालतबाट पाँच दिनको म्याद थपेर अनुसन्धान भइरहेको जिल्ला प्रहरी कार्यालय चितवनले जानकारी गराएको छ । 

ती साइकलहरु कोही कसैको चोरी भएको वा हराएको भएमा जिल्ला प्रहरी कार्यालयमा सम्पर्क राख्नहुन अनुरोध गरिएको छ ।