बैंक खातामा पाँच हजार, धरौटी पौने तीन करोड

राष्ट्रिय स्वतन्त्र पार्टी (रास्वपा) का सभापति तथा भूतपूर्व उपप्रधान एवम् गृहमन्त्रीको बैंक खातामा मौज्दात पाँच हजार रुपैयाँ देखिन्छ । तर पछिल्लो एक महिनामा चार वटा जिल्ला अदालतमा उनले धरौटी वापत दुई करोड ७९ लाख रुपैयाँ बुझाइसकेका छन् ।

कास्की अदालतको आदेशपछि सांसदबाट निलम्बित लामिछानेले सहकारी ठगी प्रकरणमा मागेजति धरौटी रकम बुझाए पनि उनको बैंक खातामा मौज्दात भने नगण्य देखिन्छ । गत वैशाख ४ गते उपप्रधानमन्त्रीको हैसियतमा प्रधानमन्त्री तथा मन्त्रिपरिषदको कार्यालयमा बुझाएको सम्पत्ति विवरणमा ग्लोबल आईएमई बैंकमा पाँच हजार र नेपाल बैंक लिमिटेडमा एक लाख पाँच हजार रहेको उल्लेख छ ।

त्यसैगरी श्रीमती निकिताको खाताहरुमध्ये सिद्धार्थ बैंकमा पाँच हजार, नेपाल बैंकमा पाँच लाख, सनराइज बैंकमा १५ हजार, एनआइएमबीमा २८ हजार र प्रभु बैंकमा १० हजार ५१ रुपैयाँ नगद देखिन्छ । कास्की, काठमाडौं, रुपन्देही र चितवन जिल्ला अदालतमा प्रभु बैंकबाट हालसम्म उपलब्ध गराइएको धरौटी रकम दुई करोड ७९ लाख रुपैयाँ पुगेको छ । 

त्यसैगरी श्रीमतीको नाममा बूढानीलकण्ठमा घर किन्दाको बैंक ऋण अझै एक करोड २५ लाख तिर्न बाँकी देखिन्छ । उनको धरौटी र तिर्न बाँकी ऋण गरेर ब्याजबाहेक चार करोड चार लाख पुगेको छ ।

त्यस्तै निकिताको स्वामित्वमा ८० तोला सुन, २० केजी चाँदी र गोपीकृष्ण मुभिजमा सेयर वापत एक करोडको सम्पत्ति रहेको उल्लेख छ । लामिछाने कास्कीमा ६५, काठमाडौंमा ६०, चितवनमा ५४ र रुपन्देहीमा एक करोड रुपैयाँ बैंक धरौटी बुझाएर रिहा भएका हुन् । सम्पत्ति विवरणमा श्रीमतीको बाहेक रविको भक्तपुरमा एक रोपनी एक आना पैतृक जग्गा उल्लेख छ । निकिताले आफ्नो भागमा चाबहिलको गोपीकृष्ण मुभिजको १० रोपनी सगोल जग्गामध्ये २५ प्रतिशत रहेको दाबी गरेकी छन् ।

उनैको नाममा ४२ लाखको टाटा नेक्सन इभी कार, गोपीकृष्ण मुभिज प्रालिमा आठ लाख ७५ हजार कित्ता सेयर रहेको सम्पत्ति विवरणमा उल्लेख छ । ८० तोला सुन र २० किलो चाँदीको स्रोत खुलाउँदै उनले केही ससुरालीले दिएको र केही आफूले किनेको दाबी गरेका छन् । गाडी किनिएको स्रोत भने श्रीमान र श्रीमतीको निजी आय र बचत भनिएको छ ।

बैंक खातामा रहेको नगद मौज्दातको स्रोत रविले पारिश्रमिक र तलब जनाएका छन् । श्रीमतीले नारी टिभीबाट प्राप्त पारिश्रमिक, इभेन्ट म्यानेजमेन्ट, युट्युबबाट आएको भएको दाबी गरेको १० महिनाअघिको विवरणमा उल्लेख छ ।