होस्टलमा मृत भेटिएकी युवतीका पूर्वप्रेमी पक्राउ
भारतको भुवनेश्वरस्थित कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी) को होस्टलमा नेपाली युवती मृत भेटिएको घटनामा पूर्वप्रेमी पक्राउ परेका छन् । बि–टेक तेस्रो वर्षमा अध्ययनरत बुटवलकी प्रकृति लम्साल हिजो साँझ होस्टलमा मृत भेटिएकी थिइन् ।
उनले आत्महत्या गरेको हुनसक्ने आशंका भइरहदा प्रहरीले एदविक श्रीवास्तवलाई नियन्त्रणमा लिएको छ । प्रकृतिले केहि समयअघि कलेज प्रशासनलाई आफूमाथि यौन दुव्र्यवहारको प्रयास भएको जानकारी गराउँदै सहयोग मागेको तथ्य बाहिरिएको छ । तर कलेज प्रशासनले उनको याचनालाई खासै चासो नदिएको पनि भारतीय सञ्चारमाध्मले जनाएका छन् । प्रकृतिका साथीहरुले पूर्वप्रमीले लामो समयदेखि दुःख दिइरहेको बयान प्रहरीसमक्ष दिएका छन् ।
पूर्व प्रेमी भनिएका श्रीवास्तव पनि सोही कलेजमा मेकानिकल इन्जिनियरिङ विषय अध्ययनरत रहेको बताइएको छ । घटनाको सत्यतथ्य छानबिनको माग गर्दै कलेजमा अध्ययनरत एक हजार बढी नेपाली विद्यार्थीले हिजो साँझ प्रदर्शनसमेत गरेका थिए । तर कलेजले प्रदर्शनमा दमन गरेको र आज नेपाली विद्यार्थीहरुलाई होस्टल छाड्न निर्देशन दिएको छ ।
यता राष्ट्रिय स्वतन्त्र पार्टीका सांसद तथा पूर्व शिक्षामन्त्री सुमना श्रेष्ठले आजको प्रतिनिधिसभा बैठकमा प्रकृतिको मृत्युबारे बोल्न खोजेको तर सभामुख देवराज घिमिरेले समय नदिएपछि झोक्किएर बैठक छाडेको पार्टीका नेताहरुले बताएका छन् ।
टिप्पणीहरू