एउटा ज्ञानेन्द्रको कुराले हौसिएका राजावादी अर्को ज्ञानेन्द्रको कुराले क्रुद्ध

पूर्वराजा ज्ञानेन्द्र शाहले व्यवस्था परिवर्तनका लागि संघर्षमा उत्रिन आह्वान गरेपछि यतिबेला राजावादी कित्तामा खुशियाली छाएको छ । राजतन्त्र र हिन्दु राष्ट्रको पक्षमा सडक र सदनमा आवाज चर्काइरहेको पूर्वपञ्चहरुको पार्टी राप्रपादेखि सडकमा कराउँदै हिँड्ने दुर्गा प्रसाईंसम्म हर्षित देखिएका छन् । 

हुन त ज्ञानेन्द्र राजतन्त्रको पक्षमा बोलेको यो नै पहिलो पटक होइन । तर, प्रजातन्त्र दिवसको अवसरमा उनले भिडियोमार्फत् शुभकामना सन्देश सार्वजनिक गर्दै पुनः शक्तिमा फर्किने प्रष्ट चाहना व्यक्त गरेपछि राजावादी खेमा हैसिएको हो । त्यसप्रति नाम कहलिएका राजावादीहरुले समर्थन र स्वागत गर्दै सडकमा ओर्लन तयार रहेको बताइसकेका छन् । 

पूर्वराजा ज्ञानेन्द्रको भाषणले यसरी जोसिएका राजावादीहरु राजसंस्था पुनर्स्थापनाको विधि के भन्नेबारे चैं आफैँभित्र एकमत नरहेको देखिन्छ । भाइरल सांसद भनेर चिनिने राप्रपाका प्रवक्ता ज्ञानबहादुर (ज्ञानेन्द्र) शाहीले पूर्वराजाको वक्तव्यलगत्तै राजतन्त्र र गणतन्त्रको छिनोफानो जनमत संग्रहमार्फत गर्नुपर्ने मत राखेका थिए । त्यसप्रति अरु स्वतन्त्र राजावादीहरुले असन्तुष्टि जनाएका हुन् । 

राप्रपा, राप्रपा नेपाललगायत कुनै पनि दलमा आवद्ध नरहेका तर राजसंस्थाको पक्षमा वकालत गर्दै आएकाहरु जनमत संग्रहको मागप्रति आक्रोशित छन् । फेसबुकमा आफ्नो नामै 'राजावादी' राखेका एकजनाले रास्ट्रपति र राजसंस्थाबीच जनमत सङ्ग्रहको माग राखेर ज्ञानबहादुरले दुबैतिर खुट्टा राखेको भन्दै चर्को आपत्ति जनाए । 

राप्रपालाई यसबारे आधिकारिक धारणा प्रष्ट पार्न उनले आग्रहसमेत गरेका छन् । सो पार्टीका अध्यक्ष राजेन्द्र लिङ्गदेन, नेता धवलशमशेर राणा र राजेन्द्र गुरुङलाई 'मेन्सन'; गर्दै उनले लेखेका छन्-छोराछोरीहरुले घरमा बाउ राख्ने कि नराख्ने भनेर चुनाव गर्ने रे लाजको पसारो !