माधव नेपालको आक्रोश: संविधान मिच्ने बानी परेकाहरु अर्को कुचेष्टा गर्दैछन्
पूर्व प्रधानमन्त्री तथा नेकपा (एकीकृत समाजवादी) का अध्यक्ष माधवकुमार नेपालले काँग्रेस–एमाले नेतृत्वको महागठबन्धन सरकार मुलुकमा दुई दलीय व्यवस्था थोपर्ने दाउमा रहेको टिप्पणी गर्नुभएको छ ।
बहुदलीय लोकतन्त्र माँसेर तानाशाही व्यवस्था लागू गर्ने प्रपन्च भैरहेको उहाँले दावी गर्नुभएको हो । आजदेखि शुरु भएको पार्टीको केन्द्रीय कमिटी बैठकलाई सम्बोधन गर्दै अध्यक्ष नेपालले भन्नुभयो, 'देशमा अहिले जुन सरकारले शासन गरिरहेको छ त्यो बहुदलीय लोकतन्त्रको मान्यतालाई चुनौति दिँदै दुईदलीय शासन व्यवस्था अघि बढाउन खोजिरहेको छ । दुई दलीयको नाममा एकदलीय तानाशाही लाद्ने सोचभन्दा त्यो भिन्न कुरा छैन ।'
प्रधानमन्त्री केपी शर्मा ओलीतर्फ संकेत गर्दै उहाँले संविधान मिच्न बानी परेकाहरु तानाशाही व्यवस्था लागू गर्ने कुचेष्टामा रहेको बताउनुभयो । सरकारले संसदीय मूल्य, मान्यता, नियम र नियमावलीसमेत मिच्ने काम गरिरहेको अध्यक्षको आरोप छ ।
'साना दलहरुलाई समाप्त पार्ने, प्रतिष्पर्धी दलहरुलाई समाप्त पार्ने र अनेक किसिमका नियन्त्रणका तौर-तरिका अपनाएर सिंगो देशमा तानाशाही लागू गर्ने कुचेष्टा गरिरहेको छ', अध्यक्ष नेपाल दावाका साथ भन्नुहुन्छ, 'संविधानलाई मिच्ने बानि परिसकेका व्यक्तिहरु कानून मिच्न पनि त्यत्ति नै अग्रसर भएका छन् । संसदको नियम र नियमावलीलाई मिच्नेदेखि लिएर विधि विधानलाई बेवास्ता गर्ने काम गरिरहको छन् ।'
सरकार आलोचकको घाँटी निमोठ्ने गरी प्रस्तुत भइरहेको जनाउँदै उहाँले आक्रोश व्यक्त गर्नुभयो । देशभित्र छुवाछुत र महिला बलात्कारका घटनाहरु बढिरहेको भएपनि अपराधीहरु दण्डित नभएकोमा आपत्ति जनाउनुभयो ।
समाजमा विद्यमान समसस्या समाधान गर्न पार्टी संगठनलाई थप बलियो बनाउँदै लैजानुपर्नेमा उहाँको विशेष जोड छ । पार्टीबारे कुप्रचार गरिएकोमा चित्त दुखाउँदै त्यस्तो भ्रममा नपर्न अध्यक्ष नेपालले नेता-कार्यकर्तालाई आग्रह पनि गर्नुभयो ।
टिप्पणीहरू