आगजनी र लुटपाटमा संलग्न राजावादीको विवरण खोज्दै प्रहरी

राजावादी आन्दोलनमा सहभागी भएर तोडफोड, आगजनी र लुटपाट गर्नेहरुलाई कानूनी दायरामा ल्याउन नेपाल प्रहरीले सर्वसाधारणसँग सहयोग मागेको छ । 

प्रहरी हेर्डक्वार्टरले आज सूचना जारी गर्दै उक्त अपराधिक गतिविधिमा संलग्न व्यक्तिहरुको फोटो, भिडियो वा विवरण भएमा उपलब्ध गराउन आग्रह गरेको हो । अस्ति काठमाडौंको तीनकुने, कोटेश्वर, सिनामंगल, जडीबुटीलगायत विभिन्न क्षेत्रमा राजावादीहरुले निजी सम्पत्ति, प्रहरी कार्यालय, सञ्चार गृह, राजनीतिक दलका कार्यालय, व्यापारिक केन्द्रसहित निजी तथा सरकारी सवारीसाधनमा आगजनी, तोडफोड र लुटपाट गरेका थिए । 

जिल्ला प्रहरी परिसर काठमाडौंका अनुसार १५ वटा स्थानमा आगजनी, नौ वटा संस्था एवं कार्यालय तोडफोड, एउटा व्यापारिक केन्द्र तोडफोड तथा लुटपाट र सरकारी तथा निजी गरी १५ वटा सवारीसाधनमा क्षति पुगेको छ । घटनामा संलग्न रहेको आरोपमा हाल एक सय बढी प्रहरी हिरासतमा छन् । 

उक्त अराजक गतिविधिमा संलग्न व्यक्तिसँग सम्बन्धित प्रमाण भएमा उपलब्ध गराउन प्रहरीको अनुरोध छ । 

सूचनामा भनिएको छ, ‘मिति २०८१ चैत १५ गते काठमाडौंको तीनकुने, कोटेश्वर, सिनामंगल, जडीबुटीलगायतका विभिन्न क्षेत्रहरुमा निजी सम्पत्ति, प्रहरी कार्यालय, सञ्चार गृह, राजनैतिक दलका कार्यालय, व्यापारिक केन्द्रलगायत निजी तथा सरकारी सवारीसाधनमा तोडफोड, आगजनी, लुटपाट एवं अन्य गैरकानूनी अपराधिक गतिविधिमा संलग्न व्यक्तिहरुका सम्बन्धमा अनुसन्धानको प्रमाण संकलनका लागि यहाँहरुसँग भएका तथ्यपरक सूचना (फोटो, भिडियो, संलग्न व्यक्तिको विवरण) उपलब्ध गरी अनुसन्धानमा सहयोग गरिदिनुहुन अनुरोध छ ।’