‘कमब्याक’ पछि रविको उद्घोष : गोली खान तयार छु

आधा दर्जन सहकारी ठगी प्रकरणमा मुछिएका पूर्व गृहमन्त्री रवि लामिछानेले गोली खान तयार रहेको बताएका छन् । राष्ट्रिय स्वतन्त्र पार्टी (सभापति) को जिम्मेवारीमा फर्किएका उनले शरीरमा एक थोपा रगत रहुञ्जेल लुटतन्त्रको विरोधमा उभिरहने उद्घोष गरेका छन् । 

उनले भने, ‘अब सरकारले छातीमा गोली ठोके पनि कुनै डर छैन । जति मुद्दा लगाउन मन लगाए हुन्छ । ज्यानमाराको लगाए पनि हुन्छ । यो सरकारले बाँकी राखेको भनेको यो छातीमा गोली ठोक्न हो, त्यसको लागि पनि म तयार छु ।’ 

लामो समयपछि बनस्थलीस्थित पार्टी कार्यालय (घण्टीघर)मा फर्किएका उनले कार्यकर्ताको नाममा विशेष सम्बोधन समेत गरेका छन् । ‘दुई वटा चोर मिल्दैमा साधु नहुने’ भन्दै उनले सरकारलाई व्यङ्ग्य पनि गरे । आफूलाई तर्साउनकै लागि सरकारले पर्सामा मुद्दा दर्ता नगरेको लामिछानेको भनाई छ । 

उलने अगाडि भने, ‘म अझै केही समय शान्त बस्न चाहन्थेँ, तर यो सरकारले फाइदा उठाउँदै टाउकोमा तरबार झुन्ड्याएपछि डराउँछ भनेर होला, एउटा अदालतमा त मुद्दा नै नबुझाएर राखेको छ’, उनले भने, ‘सरकारलाई लागेको होला, टाउकोमा तरबार झुन्ड्याएपछि म डराउँछु, तर याद रहोस्, तिमीहरुले जुनसुकै बेला तरबार खसाले पनि म शीर थाप्न तयार छु ।’

आगामी शनिबार निर्वाचन क्षेत्र (चिवतन) पुगेर जनतासामु वर्तमान सरकारको भण्डाफोर गर्ने उनको तयारी छ । योजना सुनाउँदै अघि भने, ‘शनिबार म चितवन जाँदैछु, जनतालाई म सुनाउन चाहन्छु, आखिर सरकार कसरी ढालियो ? कस्ले ढाल्यो ? कसको हातमा हतकडी हुनुपथ्र्यो ? सबै भन्छु । त्यो सभा विशेष हुनेछ ।’