आशिकाको गीत : ‘कत्रो भ्यू टावर उभिएको मकैबारीमा’
आफूलाई समाजिक अभियन्ता दावी गर्दै आएकी आशिका तामाङ ‘मकैबारी’को गीत गाएर एकपटक फेरि चर्चामा आएकी छन् । झण्डै तीन हप्ता प्रहरीको हिरासतमा बसेपछि अभिव्यक्ति र प्रस्तुतीमा सामान्य सुधार ल्याएकी उनले प्रधानमन्त्री केपी शर्मा ओलीलाई कटाक्ष गर्न छाडेकी छैनन् ।
हालै झापाको दमक पुगेकी आशिकाले मुलुककै अग्लो दावी गरिएको भ्यू टावरलाई पृष्ठभूमिमा राखेर एउटा व्यंगात्मक गीत गाएकी छन् । उनी सुनाउँछिन्,
खेतको नालीमा हो खेतको नालीमा
सुकुम्बासी टोलमा हो सुकुम्बासी टोलमा
कत्रो भ्यू टावर उभिएको
मकैबारीमा हो मकैबारीमा...
यत्तिकैमा आशिका रोकिन्छिन् । र, थप्छिन्, ‘यहाँ हरेक वर्खामा बाढी आएर सुकुम्बासी टोल नै बगाउँछ । यो भ्यूटावर बनाउने पैसाले उनीहरुको व्यवस्थापन गर्न सकिन्छ, तर...त्यता नजाऔँ ...’
उनी उही गीत दोहोर्याउँछिन्,
मकैबारीमा हो, मकैबारीमा
खेतको नालीमा हो, खेतको नालीमा...
रोचक दृश्य के भने, त्यतिकैमा उनले छेवैको एउटा मकैको बोट देखाउँदै भन्छिन्, ‘नेपाली जनताले के पायो त भन्दा मकैको घोगा ।’
आशिकाको उक्त भिडियो समाजिक सञ्जालमा भाइरल बनेको छ । प्रस्तुतीको लागि अराजकता अन्त्य गरेर व्यंगात्मक शैली अपनाएकोमा धेरैले उनको प्रशंसा गरेको देखिनछ ।
स्मरणरहोस्, आशिकाले उल्लेख गरेको भ्यू टावर प्रधानमन्त्री केपी शर्मा ओलीको योजनामा निर्माण गरिएको हो । उक्त भवनमा झण्डै सरकारको डेढ अर्ब रुपैयाँ लगानी छ ।
ट्रेन्डिङ पोस्ट
टिप्पणीहरू