हिरासतमा रहेका राजावादीहरुको विवरण खोजिँदै

राजावादीहरुको आन्दोलनका क्रममा शुक्रबार तीनकुनेबाट पक्राउ परेका प्रदर्शनकारीको विवरण माग्दै एउटा समूहले जिल्ला प्रहरी परिसर काठमाडौँमा निवेदन हालेको छ । 

‘सत्य र न्यायको खोजी अभियान’ नामक संस्थाले आज सूचनाको हकअन्तर्गत उक्त आन्दोलनमा समातिएका ५० जना र कुलमान घिसिङ्गको पक्षमा नारा लगाएवापत हिरासतमा पुगेका एक विदेशी नागरिकको विस्तृत विवरण खोजी गरेको छ । दर्ता नम्बर ११४८९ रहेको निवेदनमा उनीहरुलाई पक्रनुको कारण र हिरासत अवस्थाबारे जानकारी माग गरिएको छ ।  

संविधानको धारा १७ को हवाला दिँदै उक्त संस्थाका अध्यक्ष ध्रुवलाल श्रेष्ठले भनेका छन्, ‘संवैधानिक मौलिक हकको प्रयोग गर्ने क्रममा जे जस्तो कारण र परिस्थितिमा स्वदेसी वा विदेशी व्यक्तिहरुको प्रहरी हिरासतमा राखिएका छन् भने त्यसको कारणसहितको विवरणयुक्त जानकारी लिन पाउने हक संविधानको धारा २७ र सूचनाको हक सम्बन्धि ऐन २०६४ को दफा ३ ले दिएअनुसार यो निवेदन पेश गरेको छु ।’ 

राजावादीहरुको आन्दोलनमा पक्राउपछि हिरासतमा राखिएका ५० जनाको नाम विषयगत लिखत किताबमा उल्लेख भए–नभएको जानकारी माग्दै अगाडि भनिएको छ, ‘पक्राऊ गरी हिरासतमा राखिएका व्यक्तिहरुको नामावली भएको नाम दर्ता किताव लिखतको गोप्यता सम्बन्धी ऐन २०३९ को दफा ३, ५, ६ र ७ ले वर्गीकरण र व्यवस्था गरेको विषयगत लिखतअन्तर्गत लिखत नभएकाले त्यस्तो दर्ता कितावमा लिखत नामावली र दर्ता कितावमा नामावली अभिलेख नगरिकनै पनि हिरासतमा राखिएका व्यक्तिहरु छन् भने नामवलीसहित वा रहित तरिकाले हिरासतमा राखिएका सबै व्यक्तिहरुको पक्राउ मिति सहितको विवरण–––’

निवेदनमा राजावादी प्रदर्शनकारी कति जनालाई कुन–कुन मिति र समयमा कहाँबाट नियन्त्रणमा लिएर कुन हिरासतमा राखिएको हो त्यसको सम्पूर्ण विवरण उपलब्ध गराउन भनिएको छ । त्यस्तै, हिरासतमा रहेकाहरुले खाना, बास र उपचारसहित आफन्तसँग भेट्ने सुविधा उपलब्ध गराइए, नगराइएको विस्तृत जानकारी मागिएको छ ।