चितवनपछि कावासोतीमा पनि प्रचण्डको उस्तै दावी, बालुवाटारमा छलफल
प्रमुख प्रतिपक्षी दल नेकपा (माओवादी केन्द्र)का अध्यक्ष पुष्पकमल दाहाल प्रचण्डले वर्तमान सरकारको आयु धेरै लामो नभएको टिप्पणी गर्नुभएको छ ।
आइतबार गृहजिल्ला चितवन पुगेर ‘नयाँ वर्षमा नयाँ राजनीतिक कोर्ष बन्ने’ बताउनुभएका उहाँले आज नवलपुरमा पनि सोही दावी दोहोर्याउनुभएको हो । हुलाकी राजमार्गकेन्द्रीत तराई-मधेश जागरण अभियानअन्तर्गत कावासोतीमा आयोजित खबरदारी सभालाई सम्बोधन गर्दै उहाँले पछिल्लो घटनाक्रमले आफ्नो वाणी प्रमाणित हुँदै गएको पनि बताउनुभयो ।
‘मैले अस्ति चितवनमा बोल्दा कुनै दलका नेताहरुसँग भेटेर वा छलफल गरेर बोलेको त होइन तर, घटनाक्रमले यस्तै देखाएको छ’, प्रचण्डले भन्नुभयो, ‘मलाई लाग्छ मैले बोलेको सत्य हुँदै गएको छ, र भएरै छाड्छ ।’
पूर्व प्रधानमन्त्रीसमेत रहनुभएका उहाँले वर्तमान सरकारको आयु कम हुनुको कारणसमेत खुलाउनुभएको छ । ‘अहिले केपी ओलीको सरकारदेखि जनता मात्रै होइनन्, कांग्रेस र एमालेकै नेता र कार्यकर्ता असन्तुष्ट छन्, यो राम्रो संकेत होइन । यो नै सरकारको आयु कम हुँदै गएको आधार हो’, उहाँले थप्नुभयो ।
त्यस्तै, शिक्षक, चिकित्सक, लघुवित्त तथा सहकारी पीडित, विभिन्न दल एकैचोटी सडकमा आउनुले प्रधानमन्त्री ओलीको नालायकी छाताछुल्ल भएको प्रचण्डको भनाई छ ।
प्रचण्डले नयाँ वर्षको पूर्वसन्ध्यामा दिएको अभिव्यक्तिबारे यता प्रधानमन्त्री ओली र सत्ता साझेदार दल नेपाली कांग्रेसका सभापति शेरबहादुर देउवाबीच गम्भीर छलफल भएको बुझिएको छ । आज दिउँसो बालुवाटारमा भएको भेटवार्तामा सरकारको आयुबारे सिर्जना भएका शंका र हल्लाबारे लामो संवाद भएको बताइएको छ ।
भेटवार्ता सकिएलगत्तै प्रधानमन्त्री ओलीले ६ बजे मन्त्रिपरिषद् बैठक बोलाउनुभएको छ भने सभापति देउवाले बैशाख १७ गतेका लागि केन्द्रीय कार्यसमितिको बैठक आह्वान गरेको अवस्था छ ।
टिप्पणीहरू