दीक्षान्तमा लगाएको गाउनको धरौटी फिर्ताका लागि ताकेता

त्रिभुवन विश्वविद्यालयले दीक्षान्त समारोहमा लगाइने गाउनको लागि जम्मा गरेको धरौटी रकम फिर्ता नपाएका विद्यार्थीलाई सम्पर्कमा आउन आग्रह गरेको छ ।

त्रिवि परीक्षा नियन्त्रण कार्यालयले आज सूचना जारी गर्दै विद्यार्थीले अनलाइनमार्फत भरेको विवरणमा रकम फिर्ता गर्न बैंकमार्फत पटक-पटक प्रयास गर्दासमेत हुन नसकेको जनाएको छ । कार्यालयले रकम फिर्ता हुन नसकेका विद्यार्थीलाई यही वैशाख १५ गतेभित्र आफ्नो नाम, थर, बैंकको नाम, शाखा र खाता नम्बर प्रष्ट रुपमा उल्लेख गरी लेखा शाखाले तयार गरेको निवेदनको ढाँचाअनुसार विवरण भरेर बुझाउन भनेको छ । 

तोकिएको समयभित्र निवेदन प्राप्त नभएमा उक्त रकम कार्यालयको आम्दानीमा बाँधिनेसमेत सूचनामा जनाइएको छ । त्रिविको ५० औं दीक्षान्त समारोह गत पुसमा सम्पन्न भएको थियो ।