कोर टिम ‘अ क्यूब’ मा बदलिएको निष्कर्षसँगै घण्टीमा घमासान

रवि लामिछाने सहकारी काण्डमा मुछिएदेखि नै अनेक किचलोमा पर्दै आएको राष्ट्रिय स्वतन्त्र पार्टी (रास्वपा) मा फेरि नयाँ विवाद सल्किएको छ । 

रविको पार्टी भनिने रास्वपाका सांसद सुमना श्रेष्ठले कार्यवाहक सभापति डिपी अर्यालसमक्ष ‘एक व्यक्ति, एक पद’को अवधारणा प्रस्ताव गर्दै सहमहामन्त्रीबाट राजीनामा दिने तयारी गरेपछि आन्तरिक कलह बाहिर आएको हो । उनको यस्तो प्रस्ताव 'कोर टिम' लक्षित रहेको बताइएको छ । 

सुमनाले सहमहामन्त्री पद छोड्न लाग्नुको भित्रि कारण खुलाउँदै स्रोत भन्छ, ‘अहिले एक व्यक्ति-एक पदको कन्सेप्ट देखाएर सहमहामन्त्री पदबाट मात्रै राजीनामा दिन लाग्नुभएको हो, मन त पार्टीबाटै अलग  हुने हो । ०८४ लाग्नबित्तिकै पार्टीको साधारण सदस्य र सांसद दुवै पदबाट राजीनामा दिने रणनीति छ ।’

पार्टीभित्र ‘अनाडी, अनपढ र अव्यवहारिक’ पात्रहरु हावी भएको विश्लेषण गर्दै  उनले यहि स्थितिमा रास्वपा अघि नबढ्ने निष्कर्षसमेत निकटहरुलाई सुनाइसकेकी छन् । त्यसैले आगामी निर्वाचनमा स्वतन्त्रहरुको छुट्टै समूह बनाएर जानेबारे विभिन्न पक्षसँग सरसल्लाह भैरहेको बताइएको छ । 

‘देशभरबाट स्वतन्त्र उम्मेदवार उठाउने योजना छ, तर अहिले नै त्यसो भन्नु धेरै छिटो होला', सुमनानिकट स्रोतले खुलायो, 'दिदीले रविलाई भन्दा बालेनलाई बढी मान्नुहुन्छ । यसबाट के बुझ्ने, जनताको कुरा हो ।’ 

सुमना दिदीले रविलाई भन्दा बालेनलाई बढी मान्नुहुन्छ । यसबाट के बुझ्ने ?

बताइएअनुसार पार्टीभित्र सभापतिप्रति अन्य नेताहरुको पनि क्रमश: धारणा परिवर्तन हुँदै गएको छ । कोर टिमबाहेक अधिकांश नेताहरु व्यक्तिको पछाडि लागेर पार्टीलाई ध्वस्त बनाउन नहुनेमा खुल्न थालिसकेका छन् । 

सुमनासहित उपसभापति डा. स्वर्णिम वाग्ले, संसदीय दलका उपनेता विराजभक्त श्रेष्ठ, सांसदहरु निशा डाँगी, विनिता कठायतलगायका नेताहरुले अब पार्टीलाई रविबिना नै अघि बढाउनुपर्नेमा जोड दिँदै आएको बताइन्छ । यसबीच सुमनाको राजीनामा प्रस्तावले थप तरंग ल्याएको छ । 

केही दिनअघि जनआस्था अनलाइनमा ‘सभापति जेल परेपछि सुमनाको गुप्त अभियान’ शीर्षकको समाचार प्रकाशित भएको थियो । विभिन्न कन्टेन क्रियटर, समाजका प्रतिष्ठित महिला, बौद्धिक वर्ग र सामाजसेवीहरुसँग उनले गोप्य रुपमा भेट्दै हिँडेको विषय उल्लेख छ । यो कुरा कार्यवाहक सभापति अर्यालको कानमा पुगेपछि सुमनलाई ‘मुकुल ढकाल’ बनाउन लागिएको चर्चासमेत व्यापक छ । 

सुमनाले भने यसलाई गम्भीररुपमा नलिएको र चिन्तासमेत नजनाएको बताइन्छ । बरु ‘सभापतिज्यूको कोर टिम अ क्यूब भयो’ भन्दै निकटहरुसँग उनले असन्तुष्टि जनाएको अवस्था छ । ‘जस्तो सभापति, उस्तै कोर टिम (अ क्यूब) भयो भन्ने उहाँको निष्कर्ष छ’, स्रोतले भन्यो,‘सुमनापछि विराजभक्त श्रेष्ठ, त्यसपछि निशा डाँगीहरुको पालो आउँछ । सभापतिको लागि बाहिर मिडियामा बोलेजस्तो छैन भित्र चाहिँ ।’ 

यसैबीच सुमनाले नेकपा (एमाले)का दुई महिला सांसदलाई समेत पार्टी परित्याग गर्न सुझाव दिँदै नयाँ समूह निर्माणको लागि प्रस्ताव गरेको बताइएको छ ।