गगन थापा ‘सरकार टिक्ने तर नबिक्ने’ अवस्थाको विपक्षमा

प्रधानमन्त्री केपी शर्मा ओलीको कार्यशैलीप्रति असन्तुष्ट नेपाली काँग्रेसका महामन्त्री गगन थापाले सरकारको विकल्प अहिले नखोजेको बताएका छन् । यद्यपि सरकारले डेलिभरी दिन नसके विकल्पबारे सोच्नुपर्ने अवस्था आउनसक्ने उनले स्पष्ट पारे ।

व्यक्तिगतरूपमा अहिलेसम्म एमालेसँगको सत्ता साझेदारीका लागि भएको ७ बुँदे सहमतिको विकल्प खोज्नुर्पछ भन्नेमा नरहेको तर सरकारले डेलिभरी दिन नसके सधैँभर त्यसरी नै सोचिन्छ भन्ने नहुने उनले बताए । ‘सरकार टिक्ने तर नबिक्ने’ अवस्थाले पार्टीलाई क्षति पुग्ने भएकाले आफू सचेत रहेको थापाको भनाई छ । 

सरकार डेलिभरीमा चुकेको बताउँदै उनले संसदीय प्रणालीमा प्रधानमन्त्री निर्णायक हुने भएकाले यो स्थित अन्त्य गर्न प्रधानमन्त्री केपी शर्मा ओलीले नै भूमिका खेल्नुपर्नेमा जोडसमेत दिएका छन् ।   

‘हाम्रो कारणले सरकार तलमाथि हुँदैन भन्ने कुरामा हामी सचेत छौँ । तर हामी के कुरामा चिन्तित छौँ भने सरकार टिक्यो तर बिकेन भने त सबैभन्दा ठूलो मूल्य हामीले चुकाउनुपर्ने हुन्छ’, महामन्त्री थापाले भने, ‘काँग्रेसका अहिलेको साथीहरुको चिन्ता भनेको सरकार टिकोस् र टिकाउन लाग्छौँ । हामीलाई मन्त्री हुनुपनि छैन सरकारको दैनिक खेलमा पर्नु पनि छैन । हामी सरकार सफल बनाउनु छ भने त्यो खेलमा लाग्ने कुरै भएन । तर यो सरकारको भ्यालु पनि बढ्नु पर्यो भन्नेकुरा हो ।’

सरकारप्रति आम विश्वसनीयता गुमेको घुमाउरो स्वीकार गर्दै उनले त्यसको जस-अपजस काँग्रेसको थाप्लोमा पनि आउने भएकाले चिन्ता बढेको संकेत गरे । ‘टाउको जसको भएपनि शरीर त हाम्रो हो नि, लड्यो भने बढी घाउ त हामीले खान्छौँ नि । त्यसैले यो सकारको विश्वसनीयता बढोस्, सरकारको रेटिङ बढोस् धन्यवाद दिने शुभेक्षा दिने मान्छेको संख्या बढोस् भन्ने चिन्ता हो हाम्रो’, थापा भन्छन्, ‘फ्याक्टमा बढिरहेको छैन । अब यसलाई ढाकछपोप गरेर लुकाएर राख्ने कि, के गर्ने भनेर चिन्तन गर्न चाहन्छौँ । जस्ले गर्दा परिणाममा सरकार टिकोस् पनि बिकोस् पनि । र यसको फाइदा नेपाली काँग्रेसलाई पनि होस् भन्ने हाम्रो चिन्ता यसमा हो ।’

सरकार असफलतातर्फ उन्मुख देखिए पनि अहिले विकल्पका बारेमा चिन्तनसम्म नगरेको थापाको दाबी छ । सरकार बदल्नेबारे कुनै पनि तहमा सामान्य छलफलसमेत नभएको उनले प्रष्ट्याए ।  

‘नेपाली काँग्रेस पार्टीले बाइ च्वाइस नै राजनीतिक समझदारीमा साझेदारीमा प्रवेश गरेका हौँ । पछिल्लो समयमा काँग्रेसले आर्जन गरेको प्रतिष्ठा भनेको कुनैपनि सत्ता साझेदारीको मार्गमा प्रवेश गरिसकेपछि काँग्रेसले बेइमानी गर्दैन, उबाट त्यस्तो बेइमान हुँदैन भन्ने हो । कम्तीमा प्रतिष्ठा गुमाउन चाहँदैनौँ । त्यसको मूल्यमा कहिलेकहीँ चुकाउनुपर्ने अवस्था पनि आउला तर पनि हामी सचेत छौँ’, थापाले भने ।