प्रधानमन्त्री संसदलाई नसोधी विदेश गएकोमा माधव नेपाल असन्तुष्ट

पूर्व प्रधानमन्त्री एवं नेकपा एकीकृत समाजवादीका अध्यक्ष माधवकुमार नेपालले प्रधानमन्त्री तथा मन्त्रीहरूको वैदेशिक भ्रमण संसदीय समितिको जानकारीबिनै भइरहेको भन्दै आपत्ति प्रकट गर्नुभएको छ ।

प्रतिनिधि सभाअन्तर्गतको अन्तर्राष्ट्रिय सम्बन्ध र पर्यटन समितिको बैठकमा आज आफ्ना धारणा राख्नेक्रममा उहाँले यो विषय गम्भीरताका साथ उठाउनुभएको हो । प्रधानमन्त्री र मन्त्रीहरुले वैदेशिक भ्रमणबारे समितिमा ब्रिफिङ गर्नुपर्नेमा त्यसो नभएको अध्यक्ष नेपालको दु:खेसो छ । 

विश्व समुदायमा भइरहेका कतिपय घटनामा नेपालसमेत जोडिएको उल्लेख गर्दै उहाँले त्यसबारे समितिलाई जानकारी गराउन सभापतिको ध्यानाकर्षण पनि गराउनुभयो । त्यस्तै मन्त्री, प्रधानमन्त्रीले वैदेशिक भ्रमणमा जानुपूर्व जानकारी र आइसकेपछि ब्रिफिङ गर्ने कुरालाई अनिवार्य बनाउन माग गर्नुभयो ।

‘मन्त्रीज्यूहरुको वैदेशिक भ्रमणहरु भइरहेको छ । तर, यो समितिमा त्यसबारेमा कुनैपनि जानकारी छैन । यस कुरामा समिति र समिति सभापतिज्यूको ध्यान जानुपर्ने आवश्यकता छ’, अध्यक्ष नेपालले भन्नुभयो, ‘हामीले पनि ताकेता गरेनौं होला त्यो आफ्नो ठाउँमा छ । तर जानुभन्दा अगाडि र फर्किसकेपछि बोलाउनु होला र ब्रिफिङ सुनौँलाजस्तो लागिरहेको थियो । अहिले धेरै अन्तर्राष्ट्रिय घटनाहरु घटिरहेका छन् । त्यसमा कतिपय विषयहरु नेपालसँग जोडिएका पनि छन् । यी सबै कुराहरु यो समितिलाई जानकारी हुनुपर्दछ ।’