भारतमा रहेका नेपालीलाई सचेत रहन आग्रह, पाकिस्तानबाट फर्काउन माग

भारतको नयाँ दिल्लीस्थित नेपाली राजदूतावासले त्यहाँ रहेका आफ्ना नागरिकलाई सुरक्षित रहन आग्रह गरेको छ । भारतीय जम्मु–कश्मीर राज्यको पहलगाममा भएको आतंकवादी हमलापछि विकसित घटनाक्रमलाई मध्यनजर गर्दै दूतावासले संकटकालीन अवस्थामा सुरक्षित र आपतकालीन सेवा प्राप्त गर्न सकिने स्थानमा बस्न सूचित गराएको छ । 

दूतावासले भारत सरकारको आधिकारिक निकायबाट जारी भएको सुरक्षासम्बन्धी निर्देशनहरु पालना गर्न आग्रह गरेको छ । ‘भारतको जम्मू–कश्मीर राज्यको पहलगाममा भएको आतंकवादी हमलापछि विकसित घटनाक्रमलाई मध्यनजर गर्दै भारतमा रहेका नेपालीहरुलाई सचेत र सुरक्षित रहन एवं संकटकालीन अवस्थामा सुरक्षित र आपतकालीन सेवा प्राप्त हुनसक्ने नजिकको स्थानको पहिचान गर्न तथा भारत सरकारको आधिकारिक निकायबाट जारी भएका सुरक्षासम्बन्धी निर्देशनहरुको पालना गर्न नेपाली राजदूतावास, नयाँ दिल्ली अनुरोध गर्दछ’, जारी विज्ञप्तिमा भनिएको छ ।

त्यसैगरी, आपतकालीन अवस्थामा दूतावासको टेलिफोन नम्बर ९१–११ २३४७६२००, हटलाइन नम्बर ९१–८९२९६०१९२५ वा नेपाली महावाणिज्य दूतावासको टेलिफोन नम्बर ९१–०३२४५६१२२४ तथा मोबाइल नम्बर ९१–९७४८४६६९०० मा सम्पर्क गर्न भनिएको छ । 

छिमेकी दुई मुलुकबीच युद्ध शुरु भएपछि परराष्ट्र मन्त्रालयले पाकिस्तानमा रहेका नेपाली विद्यार्थीलाई पनि सचेत रहन आग्रह गरेको छ । रास्वपा सांसदले भने पाकिस्तानमा रहेका नेपाली विद्यार्थीलाई फर्काउन माग गरेका छन् । सांसद सुमना श्रेष्ठले पाकिस्तानमा अध्ययनरत नेपाली विद्यार्थीलाई मुलुक फर्किने वातावरण मिलाउन सरकारको ध्यानाकर्षण गराएकी हुन् । 

परराष्ट्रमन्त्री डा.आरजु राणा देउवालाई ज्ञापनपत्र बुझाउँदै पाकिस्तानमा रहेका नेपाली विद्यार्थीहरुको ज्यानको सुरक्षा गर्न र मुलुक फर्किने वातावरण बनाउन उनले आग्रह गरेकी हुन् । पाकिस्तानको लाहोर, फैसलावाद, बाहावलपुर, मुल्तान, कराँची, सियालकोट, सहिवलजस्ता ठाउँमा एमबीबीएस पढ्दै गरेका ८० भन्दा बढी नेपाली विद्यार्थीले इमेल पठाएर ज्यानको सुरक्षाका लागि आग्रह गरेको उनको भनाइ छ । 

त्यसैगरी, सांसद श्रेष्ठले विद्यार्थीको उद्धारका लागि मन्त्रालयको योजना के छ ? भन्दै प्रश्न गरेकी छन् । अगाडि लेखेकी छिन्,‘यस्तो अवस्थामा विद्यार्थीको उद्धारसम्बन्धी मन्त्रालयले के कस्तो योजना बनाएको छ ? इजरायलमा जस्तै चार्टर्ड फ्लाइट गरिन्छ भने कुन अवस्थामा गरिनेछ ? यदि नेपाल ल्याउन नसक्ने स्थिति भएमा कुन क्षेत्रमा विद्यार्थीलाई राख्ने, बस्ने खानेको व्यवस्था आदि तयारी के कस्तो हुनेछ ? यसबारे जानकारीको माग गर्दछु ।’ 

भारतीय जम्मू–कश्मीरको पहलगाममा २२ अप्रिलमा भएको आतंकवादी हमलापछि दुई मुलुक युद्धमा होमिएका छन् । भारतले उत्तर पश्चिम क्षेत्रका २५ वटा विमानस्थल बन्द गरेको छ । यता, पाकिस्तानमाथिको आकाशमा पनि प्रतिबन्ध लगाइएको छ । जसका कारण नेपाली विद्यार्थीलाई स्वदेश फर्किन थप समस्या हुने बताइन्छ ।