देउवाले नबोलेको कुरा समाचार बनेपछि कांग्रेसको आपत्ति

सत्तारुढ दल नेपाली कांग्रेसले सभापति शेरबहादुर देउवा धारणा भन्दै राजसंस्थाको बारेमा भ्रमपूर्ण प्रचार गरिएको भन्दै आपत्ति जनाएकाे छ । 

केन्द्रीय कार्यालयका मुख्यसचिव कृष्णप्रसाद पौडेलले विज्ञप्ति जारी गर्दै सभापतिको धारणा भनी गरिएको प्रचार र सम्प्रेषित समाचारको खण्डन गरे । उनले कुनै पनि भ्रममा नपर्न पार्टीपंति र सर्वसाधारणलाई आग्रह गरेका छन् । 

केही सञ्चार माध्यमले 'काँग्रेस सभापति देउवा हृदयेन्द्र शाहलाई राजा मान्न तयार' भन्दै समाचार प्रकाशित गरेका थिए । तर ती समाचारमा दावी गरिएजस्तो देउवाले कहिकतै कोहीसँग त्यस्ताे नबोलेको काँग्रेस केन्द्रीय कार्यालयले स्पष्ट पारेको छ । 

‘नेपाली कांग्रेसका सभापति तथा पूर्व प्रधानमन्त्री शेरबहादुर देउवाको धारण भनी राजसंस्थाबारे प्रकाशित भएको भ्रामक र कपोकल्पित समाचारप्रति नेपाली कांग्रेसको गम्भीर ध्यानाकृष्ट भएको छ’, विज्ञप्तिमा भनिएको छ, ‘कसैले क्षणिक स्वार्थपूर्ति गर्न राजसंस्था बारे उहाँको धारणा भनी सञ्चारमाध्यममा गलत सूचना सम्प्रेषण गर्नु अनैतिक र घोर आपत्तिजनक कार्य हो । नेपाली कांग्रेस सबै आन्दोलबाट प्राप्त उपलब्धीहरुलाई रक्षा गर्न प्रतिबद्ध रहेको दोहोर्याउँदै यस्ता समाचारप्रति विश्वास नगर्न आम नागरिकलाई अपील गर्दछौँ ।’ 

संघीय समावेशी लोकतान्त्रिक गणतन्त्र नेपालको संविधानको संरक्षण र सम्वद्र्धन गर्दै नागरिकहरूलाई पूर्ण स्वतन्त्रता, समानता र सामाजिक न्याय सहितको लोकतान्त्रिक व्यवस्थाका लागि सभापति देउवा सधैँ प्रतिबद्ध रहेको पनि विज्ञप्तिमा उल्लेख छ ।