सहकारी ठगीको मुद्दामा अदालतको आदेशले जेल परेका राष्ट्रिय स्वतन्त्र पार्टी (रास्वपा)का सभापति तथा पूर्वमन्त्री रवि लामिछानेलाई छुटाउन भन्दै पैसा उठाउने धन्दा शुरु भएको छ । रास्वपाका कार्यकर्ता र रविका समर्थकहरुले क्यूआर कोडमार्फत रकम संकलन अभियान चलाएका हुन् । 

सामाजिक सञ्जालमा तीब्र पारिएको यो अभियानअन्तर्गत देश तथा विदेशमा बस्ने नेपालीले धमाधम पैसा उठाइरहेका छन् । पैसा पठाउने केही व्यक्तिले फेसबुकमा सार्वजनिक गरेको विवरणअनुसार 'राष्ट्रिय स्वतन्त्र पार्टी' नामको बैंक खातामा रकम जम्मा गरेको देखिन्छ । ट्रान्जेक्सन डिटेलमा पैसा पठाउनुको कारण 'रवि दाइलाई समर्थनको लागि' उल्लेख गरिएको छ । 

कार्यकर्ता तहमा पैसा उठाउने क्रम चलिरहँदा रास्वपाले संस्थागत रुपमा 'सभापति बचाऊ अभियान' चलाइरहेको छ । पार्टीको तेस्रो स्थापना दिवसको अवसर पारेर रविको निर्देशनमा केन्द्रीय सचिवालय बैठकको निर्णयअनुसार अभियानअन्तर्गत हस्ताक्षर संकलन भैरहेको छ । 

रास्वपाका नेता-कार्यकर्ता,रविका समर्थकसहित केही नाम चलेका कलाकारले पनि हस्ताक्षर गरेका छन् । अमेरिकामा छँदा रविसँगै बसेका पुराना अभिनेता रमेश उप्रेती र अहिलेका चर्चित अभिनेता विपिन कार्कीले बनस्थलीस्थित रास्वपा कार्यालय पुगेर रविलाई छुटाउने अभियानमा ऐक्यवद्धता जनाउँदै सहिछाप गरेका हुन् । 

जेल सर्ने रविको पत्र जोखिममा

सहकारी ठगी, संगठित अपराध र सम्पत्ति शुद्धिकरण कसूरमा पाँच वटा जिल्लामा मुद्दा खेपिरहेका रवि अहिले भैरहवा कारागारमा छन् । बुटवलको सुप्रिम सहकारी ठगी मुद्दामा धरौटीमा छोड्ने जिल्ला अदालत रुपन्देहीको आदेश बदर गर्दै उच्च अदालत बुटवलले उनलाई पुर्पक्षका लागि थुनामा पठाएको हो । 
 
यसबीच रविले काठमाडौँको डिल्लीबजार कारागार आउन कारागार विभागमा निवेदन पनि दिएका थिए । तर, गृह मन्त्रालयले निर्णय नगरेपछि काठमाडौँ आउने चाहना पूरा भएन । भिजिट भिसा प्रकरणमा रास्वपाको उग्रतालाई कतिपयले यसमा जोडेर चर्चा गरेको पाइन्छ । 

जेल सरुवा नभएपछि असार ७ गते रविले भैरहवा कारागारबाटै २० पृष्ठको बिवरण प्रस्तुत गरेका थिए । त्यसैका आधारमा रास्वपाले हस्ताक्षर अभियान चलाएको हो । 

सुशासन, पारदर्शिता र राजनीतिक नैतिकताको नारा उठाएर एकाएक राजनीतिमा उदाएको रास्वपाले आफ्ना सभापतिमाथि सरकारले राजनीतिक प्रतिशोध साँधेको दाबी गर्दै आएको छ ।

रास्वपा र राप्रपालाई छानविन समिति अमान्य