हर्क साम्पाङकाे श्रम शिविरमा बालिकामाथि याैन दुर्व्यवहार

जन आस्था

असार २०, २०८२

धरान उपमहानगरपालिकाका मेयर हर्कराज साम्पाङले चलाएको श्रमदानमा खटिएकी एक बालिकामाथि यौन दुर्व्यवहार भएको खुलेको छ ।

वैशाख १७ गते धरान-१६ स्थित बहुभाषिक पाठशालामा चलेको श्रमदानका क्रममा भएको उक्त घटना अहिले बाहिर आएको हो । प्रहरीले बालिकामाथि यौन दुर्व्यवहार गर्ने ४९ वर्षीय खगेन्द्र राईलाई पक्राउसमेत गरिसकेको छ ।

बताइएअनुसार मेयर साम्पाङको आह्वानमा त्यो दिन खगेन्द्र श्रमदाताहरुका लागि खाना पकाउने र खुवाउने काममा खटिएका थिए । त्यसैक्रममा उनले मौकाछोपी पीडित भनिएकी बालिकालाई फकाएर श्रमस्थलभन्दा केही टाढा रहेको खोल्सामा लगेर गोप्य अंग छुने प्रयास गरेको प्रहरीले जनाएको छ ।

ती बालिकाआफ्नी आमासँग त्यहाँ सहभागी हुन पुगेकाे बताइएको छ । त्यतिबेला बालिकाकी आमाले प्रहरी बोलाउन खोजे पनि अन्य व्यक्तिले खगेन्द्रलाई ‘मानसिक विरामी’ भन्दै उन्मुक्ति दिएको दाबी गरिएको छ ।

केही दिनअघि बालिकाका आफन्तले खगेन्द्रसहित उनलाई उन्मुक्ति दिन खोज्ने दुई जनाविरुद्ध प्रहरीमा जाहेरी दिएपछि घटना सतहमा आएको हो । उता मेयर साम्पाङले भने साढे दुई महिनासम्म कुरा लुकाएको भन्दै पीडित परिवारमाथि नै शंका गरेका छन् ।

श्रमदानको बदनाम गराउन बालिकाका आफन्तले नियोजित रुपमा जाहेरी दिएको साम्पाङको दावी छ । ‘यत्रो समयसम्म घटना किन लुकाएको ? यति दुर्व्यवहार प्रमाणित भए म कारबाही गर्छु, नत्र माफी माग्नुपर्छ’ उनले फेसबुकमा भनेका थिए, ‘यदि यस्तो होइन रहेछ भने आरोप लगाउनेले माफी मागेर कसले यस्तो भन्न लगाएको हो बाहिर ल्याउनुपर्छ ।’