जेनजी प्रदर्शनले ज्येष्ठ नागरिक प्रभावित

दशैंको मुखमा सामाजिक सुरक्षा भत्ताबाट वञ्चित भएपछि ज्येष्ठ नागरिकहरू मर्कामा परेका छन् । 

परिचयपत्र नवीकरण नभएको भन्दै बैंकहरूले रकम भुक्तानी गर्न अस्वीकार गरेपछि चाडपर्वको मुखमा वृद्धवृद्धाहरू अप्ठेरोमा परेका हुन् । सरकारले सामाजिक सुरक्षा कोषअन्तर्गत मासिक चार हजार रुपैयाँका दरले हरेक तीन महिनामा भत्ता वितरण गर्दै आएको छ ।

त्यसका लागि भदौ मसान्तभित्र परिचयपत्र नवीकरण गरिसक्नुपर्ने व्यवस्था छ । तर, भदौ २३ को जेनजी प्रदर्शन र भोलिपल्ट भएको विध्वंशका कारण अधिकांश वडा कार्यालय बन्द हुँदा परिचयपत्र नवीकरण प्रभावित भयो । 

बैंकहरूले नवीकरण ढिला भएको कारण देखाएर रित्तो हात फर्काएपछि भत्ता प्राप्तकर्ताहरू यतिबेला सरोकारवाला निकाय गुहारिरहेका छन् । केही जेष्ठ नागरिकले निवेदन बुझाउँदै बैंकलाई तत्काल भुक्तानीका लागि निर्देशन दिन ध्यानाकर्षण गराएका छन् । 

आफूहरुको लापरवाहीको कारण नभएर देशव्यापी आन्दोलन र कार्यालय बन्दले निर्धारित समयमा परिचयपत्र नवीकरण गराउन नसकेको उल्लेख गर्दै यसलाई गम्भिरतापूर्वक लिन निवेदनमा आग्रह गरिएको छ । भत्ताको विषयमा छिट्टै निर्णय नभए आफूहरु गम्भीर समस्यामा पर्ने गुनासो उनीहरुले गरेका छन् । 

‘यो अवस्था हाम्रो लापरवाहीका कारण नभई, देशव्यापी आन्दोलन र कार्यालय बन्दको बाध्यताका कारण उत्पन्न भएको स्पष्ट तथ्य हो । दशैंजस्तो ठूलो पर्वको मुखमा भत्ता रोकिदाँ हामीजस्ता ज्येष्ठ नागरिक गम्भीर आर्थिक कठिनाइमा परेको छौं’,निवेदनमा भनिएको छ,‘अतः बैंकलाई तत्काल भुक्तानी गर्न निर्देशन दिनुहुन र भविष्यमा यस्ता ढिलाइका कारण ज्येष्ठ नागरिकहरु असुविधामा नपर्ने व्यवस्था मिलाइदिनुहुन यो निवेदनमार्फत हार्दिक अनुरोध गर्दछौं । हामी यसप्रति छिटो निर्णय र आवश्यक कार्यवाहीको आशा गर्दछौं ।’