महेश बस्नेतलाई रङ छ्यापेपछि ‘हाइअर्लट’ मा प्रहरी

नेपाल (एमाले)का पोलिटब्युरो सदस्य महेश बस्नेतमाथि विराटनगरमा आक्रमणको प्रयास गर्ने युवाहरु नेपाली कांग्रेस निकट रहेको पाइएको छ । घटनालगत्तै पक्राउ परेका सन्जोग गौतम र अर्पित कुवँर नेपाल विद्यार्थी संघको मोरङ जिल्ला कार्य समितिको सदस्य रहेको पाइएको हो । 

गौतमले इटहरी जाँदै गरेका बस्नेतलाई विराटनगर विमानस्थलबाहिर रातो रङ छ्यापेका थिए । यद्यपि, उनी तत्काल पक्राउ परिसकेका छन् । 

बस्नेतविरुद्ध सुनसरीको दुहबीमा पनि जेनजी युवाले नाराबाजी गरेका छन् । बस्नेत र भानुभक्त ढकाल रहेको गाडी विराटनगर विमानस्थलबाट इटहरी जाँदै गर्दा युवाहरुले दुहवीसहित विभिन्न ठाउँमा नाराबाजी गरेका हुन् । बस्नेत युवा संघको कोशी प्रदेशस्तरीय जागरण सभामा सहभागी हुन इटहरी पुगेपछि कार्यक्रमस्थल परिसरमा व्यापक प्रहरी परिचालन गरिएको छ ।