‘डिस होम गो’ मा दिनहुँ डेढ लाखले एनपिएल हेर्दै

नेपाल प्रिमियर लिग (एनपिएल)को दोस्रो संस्करणका खेलहरू  ‘डिस होम गो’ एपबाट दैनिक डेढ लाखभन्दा बढीले हेर्ने गरेको पाइएको छ । 

एनपिएलको प्रत्यक्ष प्रशारणका लागि साझेदार संस्था डिस मिडिया नेटवर्कले उक्त एपमार्फत् देश तथा विदेशमा रहेका लाखौँले एकैसाथ खेल हेरेको जनाएको हो । नेपाल क्रिकेट संघ (क्यान) बाट ओटीटी अधिकार पाएको नेटवर्कले यसरी खेल हेर्नेहरूमा अधिकांश एन्ड्रोयड र आइओइस प्रयोगकर्ता रहेको बताएको छ । 

दर्शकले एनपिएलका खेलहरू आफ्नै मोबाइलमा हेर्न गुगल प्ले-स्टोर तथा एप्पल स्टोसमा गएर ‘डिस होम गो’ डाउनलोड गर्नुपर्ने हुन्छ । त्यसपछि नेपालभित्र तीन सय, मध्यपूर्वका देशमा पाँच सय र अन्य मुलुकमा दश अमेरिकी डलर भुक्तानी गरेर खेल हेर्न सकिन्छ । 

सहजै भुक्तानीको लागि मोबाइल वालेट (इसेवा र खल्ती) प्रयोग गर्न सकिने बताइएको छ । एप कम्पनीका अनुसार एनपिएल (दोस्रो संस्करण)को पहिलो खेल (काठमाडौँ गुर्खाज भर्सेज जनकपुर बोल्ट्स) दुई लाख बढीले हेरेका थिए । 

त्यतिबेला दर्शकको अत्याधिक चापको कारण मोबाइल प्रयोगकर्ताको लागि केही समस्यासमेत सिर्जना भएको थियो । तर भोलिपल्टै कम्पनीले प्राविधिक समस्या समाधान गरेर दर्शकलाई सजिलै खेल हेर्न मिल्ने बनाएको थियो ।