देशमा अनर्थ हुँदैछ : रामचन्द्र पौडेल

सर्वोच्च अदालतमा विचाराधीन मुद्दा भएकाले संसद पुनर्स्थापनाको पक्षमा बोल्न नहुने सभापति शेरबहादुर देउवाको धारणा सार्वजनिक भइरहेको बेला पौडेलले जनताको आवाज सर्वोच्चसम्म पुर्याउनका लागि आन्दोलनमा आउन कार्यकर्तालाई अपिल गरेका हुन् । ‘देशभर आन्दोलन गरेर हाम्रो आवाज सर्वोच्चमा पु¥याउनुपर्छ,दबाव दिनुपर्छ’,उनले भने, ‘संसद विघटनको निर्णय नसच्चिए देशमा अनर्थ हुन्छ । सबैतिर जुटेर यसविरुद्ध सशक्त आवाज दिनुपर्ने आवश्यकता छ । गाउँ गाउँबाट जुटेर विरोध गरौँ ।’

भोलि शनिबार काँग्रेसले देशभरका ७ सय ५३ वटै पालिकामा गर्न लागेको विरोध कार्यक्रमको पूर्वसन्ध्यामा भर्चुअल सम्बोधनमार्फत् पौडेलले उक्त कुरा बताएका हुन् । संसद विघटनको निर्णयलाई प्रधानमन्त्री ओलीले नै राजनीतिक निर्णय भनेर असंवैधानिक कदमको रूपमा स्वीकारेको पौडेलको जिकिर छ । उनले संविधान र व्यवस्थामाथि एकैसाथ प्रहार भएकोले आन्दोलन गर्नुपरेको बताएका छन् ।

‘यो असंवैधानिक कार्यको तीव्र विरोध गरौँ’, उनले भने, ‘यसले संविधानमा ठूलो क्षति पुगेको छ । ७० वर्ष लगाएर तयार पारेको संविधान र व्यवस्थाको टुङ्गो बल्ल बल्ल लागेका बेला त्यसैमाथि प्रहार भएको छ ।’ प्रतिनिधिसभा विघटनले मुलुकलाई राजनीतिक अस्थिरताको भूमरीमा हाल्ने प्रपञ्च भैरहेको बताउँदै पौडेलले यसको विरुद्ध उत्रिनुपर्नेमा जोड दिए । ‘अन्यथा मुलुकमा अनर्थ हुने’ उनको भनाइ छ ।