गोलि प्रहारबाट घाइते माओवादीका जिल्ला नेता दिपक पाण्डेको निधन

गोली प्रहारबाट गम्भीर घाइते नेकपा माओवादी केन्द्र, कपिलवस्तुका जिल्ला सदस्य दिपक पाण्डेको निधन भएको छ । पाण्डे र एक भारतीय नागरिकमाथि गत बुधबार राती तीन जनाको समूहले तौलिहवा–जितपुर सडकखण्डको सडवामा मोटरसाइकलमा जाँदै गर्दा गोली प्रहार गरेको थियो ।

पेट र कम्मरमा दुईवटा गोली लागेका पाण्डेको युनिभर्सल मेडिकल कलेज भैरहवामा उपचार गरिएको थियो । अवस्था जटिल बनेपछि उनलाई थप उपचारको निम्ति हेलिकोप्टरबाट हिजो राती ८ बजे त्रिभुवन विश्वविद्यालय शिक्षण अस्पताल, महाराजगञ्ज ल्याइएको थियो ।
तर पाण्डेको गए राति नै निधन भएको छ । पाखुरामा एउटा गोली लागेका भारतीय नागरिकको अवस्था भने सामान्य रहेको र उनी उपचारपछि घर फर्केको प्रहरीले जनाएको छ ।

प्रहरीले उनीहरुमाथि आक्रमण गरेको आरोपमा दुई जनालाई पक्राउ गरिसकेको छ । पक्राउ पर्नेमा कपिलवस्तु नगरपालिका–१ का ३९ वर्षीय ओमप्रकाश यादव र कपिलवस्तु नगरपालिका–२ का ३३ वर्षीय साकिर अली छन् ।

घटनामा संलग्न भएका भनिएकाहरुबाट लु१६प ३४९७ नम्बरको पल्सर मोटरसाइकल, २ थान मोबाइल, १ थान जंगी राउण्ड, १ थान खोका पनि बरामद गरिएको कपिलवस्तु प्रहरीले बताएको छ ।