निषेधाज्ञा उल्लंघन गर्ने सयौं सवारी साधन नियन्त्रणमा

विभिन्न जिल्लामा लागू गरिएको निषेधाज्ञा कार्यान्वयनको सिलसिलामा पछिल्लो २४ घण्टामा निषेधाज्ञा उल्लंघन गर्ने १ हजार ७ सय ७ वटा सवारी साधन कारबाहीमा परेका छन् ।

तीमध्ये ४ सय ६९ वटा चारपाँग्रे र १ हजार २ सय ३८ वटा मोटरसाइकल रहेका छन् । नियन्त्रणमा लिइएका सवारीसाधनलाई आवश्यक सोधपुछ पश्चात् छाडिएको बताइएको छ ।

नयाँ भेरियन्टसहितको कोभिड–१९ संक्रमणको रोकथाम तथा जोखिम न्यूनीकरणका लागि नेपाल प्रहरीद्वारा सञ्चालित ‘तपाईंको मास्क खोई’ कार्यक्रमअन्तर्गत पछिल्लो २४ घण्टामा ८ सय ४९ जनालाई निःशुल्क मास्क वितरण गरिएको छ ।

देशभर सञ्चालित ८० वटा माइकिङ, प्लेकार्ड, पर्चापम्प्लेटसहितको सचेतनामूलक कार्यक्रमअन्तर्गत १५ हजार ४४ जनालाई सचेत गराइएको पनि प्रहरीले जनाएको छ ।