गृहमन्त्री बादललाई हराउनेको शपथ १ बजे

राष्ट्रिय सभाको बागमती प्रदेशबाट रिक्त सदस्य पदमा जेठ छ गते सम्पन्न उपनिर्वाचनमा विजयी उम्मेदवार डा.खिमलाल देवकोटाको शपथ ग्रहण अहिले दिउँसो १ बजे संसद भवन,नयाँ बानेश्वरमा हुने भएको छ ।

उहाँलाई राष्ट्रिय सभाका अध्यक्ष गणेशप्रसाद तिमिल्सिनाले पद तथा गोपनीयताको शपथ गराउनुहुने छ । गत साता सम्पन्न उपनिर्वाचनको प्रतिवेदन निर्वाचन आयोगले हिजो अपरान्ह राष्ट्रपतिसमक्ष बुझाएको थियो ।

आयोगले हिजै संसद सचिवालयलाई पत्रमार्फत् देवकोटा विजयी हुनुभएको औपचारिक जानकारी गराएलगत्तै आज दिउँसो शपथ ग्रहणको कार्यक्रम राखिएको संसद सचिवालय स्रोतले जनाएको छ ।

जेठ ६ गते भएको उपनिर्वाचनमा तत्कालीन गृहमन्त्री तथा एमाले उम्मेदवार रामबहादुर थापा ‘बादल’ लाई १ हजारभन्दा बढी मतभारले पराजित गर्दै देवकोटा विजयी हुनुभएको थियो ।

उहाँलाई एमालेका वरिष्ठ नेता माधवकुमार नेपालको प्रस्तावमा नेपाली काँग्रेस,एमाओवादी र जसपाको समर्थन रहेको थियो ।