सप्तरीमा आइलागेको थप सकस

सप्तरी जिल्ला अदालतले कोभिड १९ को संक्रमण देशैभरि व्यापक रुपमा विस्तार भइरहेकोले अदालतबाट प्रदान गरिने नियमित न्यायिक सेवाहरु यथास्थितिमा रहने गरी स्थगित गरिएको छ ।

कोरोनाबाट अदालतमा कार्यरत केही कर्मचारी,कानून व्यवसायी र सेवाग्राहीहरुसमेत संक्रमित भएकोले सेवा स्थगनको अवधि बढाउनु परेको हो । यो अवधि जेठ २१ गतेसम्म राखिएको छ । स्थगनको सूचना जेठ १४ गते शुक्रवार निमित्त स्रेस्तेदार नवराज खडकाले जारी गरेका हुन् ।उच्च अदालत र सप्तरी बार एशोसिएशन इकाईले जिल्ला अदालत सप्तरीलाई कोरोनाको कारण नियमित मुद्दाको काम काम संकुचन गर्न अनुरोध गरेपछि स्थगन गरिएको हो । संकुचनको दायरामा समेट्न नसकिने सेवाहरु भने निरन्तर प्रवाह गर्ने व्यवस्थासमेत मिलाइएको छ । स्थगन नभएका सेवाहरुमा पक्राउ पूर्जी अनुमति,जारी,समर्थन,म्याद थप र कल डिटेलसम्बन्धी अनुमति लिने कार्य अनिवार्यरुपमा अनलाइन वा भिडियो कन्फ्ररेन्समार्फत् नियमित गर्ने गराउने यसका साथै अभियोगपत्र दर्ता गर्ने,पक्राउ परी आएका अभियुक्तको बयान लिने र थुनछेक आदेशसम्बन्धी सेवा भने प्रदान गरिने छ ।

त्यसैगरी फौजदारी कार्यविधि संहिता २०७४ को दफा १५५ बमोजिमको मुद्दा, बालबालिका र कोभिड १९ सँग सम्वन्धी मुद्दामामिलाहरु पनि निवेदन मुद्दाहरु दर्ता तथा सुनुवाई गर्ने व्यवस्था मिलाइएको छ ।