कोभिड रिपोर्ट पुर्याउन गएकी महिलाको जङ्गलमा लाश

कोरोनाको रिपोर्ट पुर्याउन असार दुई गते जोगबुढा अस्पताल जाने क्रममा बेपत्ता भएकी साधनी स्वास्थ्य चौकीमा कार्यरत कार्यालय सहयोगी मृत अवस्थामा फेला परेकी छन् । डडेलधुराको हट्वानी सामुदायिक वनमा हिजो २६ वर्षीया अस्मिता धामीको शव भेटिएको हो ।

कोभिड खोपको रिपोर्ट लिएर करिब ११ बजेको समय स्वास्थ्य चौकीबाट हिंडेकी उनी जोगबुढा नपुग्दै बेपत्ता भएपछि परिवारले हिजो मात्र ३ गतेबाट धामी हराएको भन्दै प्रहरीमा उजुर गरेका थिए । उजुरी प्राप्त हुनासाथ खोजी कार्य जारी राखेको प्रहरीले हिजो बेलुका उनको शव हट्वानी सामुदायिक वनमा फेला पारेको हो ।

पानी परेकाले हिजो खोजी कार्यमा कठिनाई भएपनि उनको शव पल्टेर रहेको अवस्थामा जङ्गलमा फेला परेको थियो । शवको प्रकृति सामान्य रहेको बताएको प्रहरीले उनको जवरजस्ति करणी गरी हत्या गरिएको हो होइन भन्ने विषयमा भने पोष्टमार्टम रिपोर्ट आएपछि मात्र थाहा हुने जनाएको छ । शरिरमा बाहिरी चोट नदेखिए पनि स्थानीयले हत्याको आशङ्का गरेको र प्रहरीले अनुसन्धान प्रकृया अगाडि बढाएको जनाएको छ ।