एमसीसी पारित गरे मुलुकमा विद्रोह हुने विप्लवको चेतावनी

नेपाल कम्युनिष्ट पार्टी (नेकपा)का महासचिव नेत्रविक्रम चन्द विप्लवले नेपालमा जबर्जस्ती थोपर्न खोजिएको एमसीसी कुनै हालतमा स्वीकार गर्न नहुने बताउनुभएको छ । एमसीसी खारेजीको माग गर्दै आज काठमाडौँमा आयोजित बिरोधसभालाई सम्बोधन गर्दै उहाँले जबर्जस्ती लाद्न खोजे विद्रोह हुने चेतावनी समेत दिनुभएको छ ।

एमसीसी नेपालको राष्ट्रिय स्वाधीनता, स्वतन्त्रता र सर्वभौमिकताको विरुद्धमा रहेको भन्दै उहाँले कुनै हालतमा स्वीकार गर्न नसकिने उल्लेख गर्नुभयो । विप्लवले भन्नुभयो, ‘एमसीसी सम्झौता जबर्जस्त लादिँदै छ, हामीले प्रतिबन्धको समयमा पनि यसको बिरोध गरेका थियौं यो हाम्रो राष्ट्रिय स्वाधीनताको विरुद्धमा छ । त्यसैले कुनै पनि हालतमा लागु गर्न दिँदैनौँ ।’

५० करोड डलरसँग राष्ट्रियता साट्न नसकिने भन्दै विप्लवले विदेशीको पैसाले मुलुकको कायापलट हुन्छ भन्नु दलाल मानसिकता भएको बताउनुभयो । उहाँले मुलुकको स्वाभिमान रोज्ने कि अमेरिकी डलर भनेर प्रश्नसमेत गर्नुभयो । भन्नुभयो, ‘प्रधानमन्त्रीदेखि कतिपय मन्त्रीले एमसीसीको पैसाले समृद्धि हासिल गर्न सकिने बताएका छन् । अमेरिकाले दिएको ५० करोड डलरले के नेपालको कायापलट हुन्छ रु’

बिरोधसभालाई सम्बोधन गर्दै नेकपा मालेका महासचिव सिपी मैनालीले एमसीसीका नाममा वैदेशिक हस्तक्षेप बढिरहेकोप्रति चिन्ता व्यक्त गर्नुभयो । नेपालको स्वतन्त्रता र राष्ट्रिय स्वाधीनताविरुद्ध रहेको एमसीसी सम्झौता कुनै हालतमा स्वीकार गर्न नहुनेमा जोड दिँदै उहाँले सम्झौता खारेज नहुँदासम्म निरन्तर आन्दोलन गर्ने चेतावनी दिनुभयो ।

कार्यक्रममा वैज्ञानिक समाजवादी पार्टीका संयोजक विश्वभक्त दुलाल आहुति, नेकपाका अध्यक्ष ऋषिराम कट्टेल, अधिवक्ता सुरेन्द्र भण्डारीलगायतले सम्बोधन गरेका थिए । उनीहरुले एमसीसी सहयोगका नाममा नेपाललाई अमेरिकी सैन्य रणनीतिमा छिराउन खोजिएको भन्दै कुनै हालतमा सम्झौता स्वीकार गर्न नहुनेमा जोड दिए । उनीहरुले एमसीसी खारेज नहुँदासम्म निरन्तर आन्दोलन गर्नुपर्ने बताए ।