बेपत्ता व्यक्तिको परिवारलाई राहतको अवसर

सशस्त्र द्वन्द्वको बेला बेपत्ता पारिएका व्यक्तिको बारेमा उजुरी दिन छुट भएका परिवारले प्रमाणसहित आउन सक्ने भएपछि पीडित परिवारले राहत महसुस गरेका छन् ।

बेपत्ता पारिएका व्यक्तिको छानविन आयोगले एक सूचना जारी गर्दै उजुरी दिने समयावधि थप गरेको छ । आयोगले व्यक्ति बेपत्ता भएको भन्ने आधार प्रमाणसहित आउँदो पुस मसान्तसम्म आयोगको कार्यालय पुल्चोक ललितपुरमा दर्ता सनाखत हुने गरी उजुरी दिन सकिने भनेको छ ।

आयोगले त्यस्तो उजुरी विद्युतीय माध्यमबाट समेत दिन पाउने व्यवस्था गरेको छ । त्यसका लागि [email protected] नामको इमेल ठेगाना उपलब्ध गराएको छ ।

यसअघि पनि आयोगले पटक पटक सूचना प्रकाशित गरेको थियो । सूचनाको पहुँचमा नरहेका अशिक्षित र ग्रामीण भेगका पीडितहरु भने उजुरी दर्ता गर्नबाट बन्चित हुँदै आएका छन् ।

द्वन्द्वको बेला बेपत्ता भएका व्यक्तिहरुले उचित न्याय नपाएको भन्ने गुनासोलाई उचित सम्बोधन गर्न बेपत्ता पारिएका व्यक्तिको छानविन आयोग नियमावली २०७२ को नियम ३ बमोजिम सूचना जारी गरिएको जनाइएको छ ।