सडक र बस दुबैतिर नगद र सुनको सिक्री लुटियो

बसमा यात्रारत यात्रु र सडका हिँडिरहेका पैदल यात्रुको नगद र सुनका सिक्री लुटेको अभियोगमा प्रहरीले चार जनालाई पक्रेको छ ।

धादिङबाट वीरगञ्जतर्फ जाँदै गरेको ना. ५ ख ५३७२ नम्बरको बसका यात्रुको १ लाख ५ हजार रूपैयाँ नगद लुटपाट गरेको अभियोगमा दुई जना तथा पश्चिम नवलपरासीमा सुनको सिक्री लुटपाट गरेको अभियोगमा दुई जना गरि चार जना समातिएका हुन् ।

धादिङबाट वीरगञ्जतर्फ जाँदै गरेको बसमा जितपुरसिमरा उपमहानगरपालिका ७ का ४५ वर्षीय पुरूषको साथमा रहेको नगद काभ्रे घर भएका ३० वर्षीय राजु लामा सहितको दुई जनाको टोलीले लुटपाट गरेको हो ।

लुटपाटमा राजुलगायत तीन जनाले यात्रुलाई हातपात समेत गरेको बताइएको छ । उनीहरुमध्ये फरार एक जनाको भने प्रहरीले खोजी गरिरहेको छ ।

उता, पश्चिम नवलपरासीको बर्दघाट नगरपालिका १३, मौराटाडी की ५८ वर्षीया महिलाको ३ तोला ५० लाल बराबरको सुनको सिक्री लुटपाट गरेको अभियोगमा सुनवल नगरपालिका १२, फरौलीका १९ वर्षीय देवराज यादवसहित दुई जना पक्राउ परेका छन् ।

स्थानीय सडकमा पैदल हिँडिरहेको अवस्थामा लु.७४प ४५०८ नम्बरको मोटरसाइकलमा आएका उनीहरू महिलाले लगाएको उक्त सिक्री लुटेर फरार भएका थिए ।