महिलालाई बोक्सी भन्दै मलमुत्र खुवाउने जेल चलान

एक महिलालाई बोक्सीको आरोपमा मानव मलमूत्र खुवाउने चार जना अभियुक्तलाई पुर्पक्षकाे लागि थुनामा राख्ने आदेश महाेत्तरी जिल्ला अदालतले दिएको छ । अदालतकाे आदेशपछि प्रहरीले जलेश्वर नगरपालिका–४ सुगा गाउँका सिकिन्दर महतोकी पत्नी पुरनीदेवी, रगेश्वर महतोकी पत्नी प्रमिलादेवी, महतोकै जेठो छोरा सिकन्दर र कान्छो छोरा अनिललाई जलेश्वर कारागारमा पठाएको छ ।

तिनले सप्तमीका दिन बिहान ३ बजे सोही ठाउँका शम्भु महतोकी पत्नी ४२ वर्षीया सुकमरियादेवी टोलमा घुमिरहेको अवस्थामा समातेर मलमुत्र ख्वाएका थिए । पीडित महिला सिकन्दर महतोको घर अगाडि पुग्दा निजकी छोरी १३ वर्षीया काजल रोइकराइ गरेकी थिइन् । छोरी रोएको देखेपछि सिकिन्दरकाे परिवारका चारै जनाले सुकमरियाले नै जादु र टुनामुना लगाएको आराेप लगाउँदै समातेर मलमूत्र खुवाएका थिए । आरोपितहरूले सुकमरियालाई घर अगाडि बिजुलीको पोलमा बाँधेर कपाल काटिदिएको,शरीरको कपडा फुकालेर नाङ्गो बनाएको,टाउको र अनुहारमा कालो र सेतोले दलेर मानव मलमूत्र खुवाएका थिए । सो घटना सार्वजनिक भएपछि प्रहरीले कात्तिक १ गते अभियुक्तहरूलाई पक्राउ गरेर अनुसन्धान अघि बढाई अदालतमा बुझाइएको थियो ।