अदालतको विवादमा प्रधानमन्त्रीले २-३ दिनमा पहल थाल्ने
प्रधानन्यायाधीश चोलेन्द्रसमशेर राणाको राजीनामा माग्दै आन्दोलनमा उत्रिएको नेपाल बार एशोसिएशनका पदाधिकारीहरुले भर्खरै प्रधानमन्त्री शेरबहादुर देउवासंगको छलफल सकेका छन् ।
प्रधानमन्त्री निवासमा भएको भेटवार्तामा बार नेतृत्वले न्यायालयमा देखिएको विवाद र कानुन व्यवसायीहरुको आन्दोलनबारे सरकारको ध्यानाकर्षण गराएको भेटमा सहभागी बार महासचिव लीलामणि पौडेलले जानकारी दिए । सो क्रममा विवाद समाधनका लागि सरकारले पहल गर्न प्रधानमन्त्रीलाई आग्रह गरिएको थियो ।
प्रधानमन्त्री देउवाले न्यायालय बिवाद र बारको मागबारे आफू जानकार रहेको भन्दै गठबन्धनभित्र आवश्यक छलफल गरेर एक-दुई दिनमै निकासको निम्ति पहल गर्ने विश्वास दिलाउनु भएको महासचिव पौडेलले बताए ।
एमाले महाधिवेशनमा शुभकामना दिन चितवन जान लाग्नुभएका प्रधानमन्त्रीलाई भेटका लागि बारले १० मीनेटको समय पाएकोमा ४० मीनेट छलफल भएको थियो ।
केन्द्रीय र सर्वोच्च बारबाट चण्डेश्वर श्रेष्ठ,पूर्णमान शाक्य,शम्भु थापा,लीलामणि पौडेलसहित सँलग्न बारको टोली र प्रधानमन्त्रीबीच छलफल भैरहँदा प्रधानन्यायाधीश राणा भने प्रधानमन्त्री निवास नजिकै रहेको आफ्नै क्वार्टरमा हुनुहुन्छ । रुघाखोकी र पेटको समस्याले केही दिनदेखि उहाँ स्वास्थ्य लाभ गरिरहनु भएको छ ।
टिप्पणीहरू