पौडेल पक्षको अन्तिम कसरत बत्तिसपुतलीमा चल्दै

नेपाली काँग्रेसको जारी १४ औं महाधिवेशनमा सभापति तथा प्रधानमन्त्री शेरबहादुर देउवासँग प्रतिस्पर्धा गर्न पार्टीभित्रको इतर समूहबाट सर्वसम्मत नेतृत्व छान्ने अन्तिम प्रयास भएको छ ।

अहिले साँझ सवा ७ बजेपछि वरिष्ठ नेता रामचन्द्र पौडेललगायत विपक्षी समूह बत्तिसपुतलीस्थित अनुपम फुडल्याण्डमा जम्मा भएको छ । प्रकाशमान सिंह,शेखर कोइराला र पौडेलबीच सहमति हुन नसक्दा उनीहरुले अन्तिम प्रयास भन्दै अहिले बत्तिसपुतलीमा भेटघाट र छलफलको मेसो मिलाएका हुन् ।

बत्तिसपुतलीमा पौडेलसँगै रक्षामन्त्री मीनेन्द्र रिजाल र नेताहरु डा. रामशरण महत,चन्द्र भण्डारी, दिपक गिरी,दिलेन्द्र बडु,रामकृष्ण यादव, अर्जुननरसिंह केसी,बलबहादुर केसी, धनराज गुरुङ,सशांक कोइराला, शेखर काेइराला, प्रकाशमान सिंहलगायत झण्डै ६० जनाको उपस्थिति रहेको छ ।

तेस्रो धारको रुपमा उभिएको नेता कृष्णप्रसाद सिटौला पक्षले अहिलेसम्म मुख खोलेको छैन । जिल्ला र प्रदेश अधिवेशनमा उक्त पक्षले देउवा समूहलाई सघाएको थियो ।