फाइजरको ‘कोभिड चक्की’ लाई अमेरिकी मान्यता, कम तौल हुनेलाई मनाही

फाइजर कम्पनीले उत्पादन गरेको कोभिडविरुद्धको औषधि ‘कोभिड पिल’ अमेरिकामा प्रयोग गर्न पाइने भएको छ । अमेरिकी स्वास्थ्य निकायले फाइजरको कोभिड पिललाई प्रयोगको अनुमति दिएको हो । उक्त औषधि संवन्धित व्यक्तिले मुखबाटै खान सक्छन् ।

कोभिड संक्रमित वयस्क र १२ वर्षमाथिका बालबालिकाले मात्र फाइजरको पिल प्रयोग गर्न सक्छन् । अमेरिकाको खाद्य तथा औषधि प्रशासन एफडीएका अनुसार प्रारम्भमा अस्पताल जानु पर्ने लक्षण देखिएका कोभिड संक्रमितले घरमै त्यस्ता पिल प्रयोग गर्न सक्नेछन् ।

फाइजरको कोभिड पिलले प्रयोगको अनुमति पाएसँगै मानिसले घरमै पिल सेवन गरेर कोरोना भाइरसको अति खराब असरलाई समेत कम गर्न सक्ने बताइएको छ । प्याक्सलोभिड नामक फाइजरको पिल कोभिड १९ को प्रारम्भिक संक्रमणलाई तत्काल निको पार्ने औषधि मानिएको छ ।

मिर्गौला वा कलेजोका गम्भीर समस्या भएका व्यक्तिले भने उक्त औषधि प्रयोग गर्न नमिल्ने बताइएको छ । साथै, पिल प्रयोगका लागि १२ वर्षमाथिका बालबालिकाको तौल कम्तिमा ४० किलो हुनै पर्नेछ । कम तौल भएकाले यसको प्रयोग गर्न हुँदैन भनिएको छ ।

गम्भीर अवस्थामा पुग्न सक्ने लक्षण देखिएका कोभिड संक्रमितले प्याक्सलोभिड पिल खाएपछि अस्पताल भर्ना र मृत्युको सम्भावना ९० प्रतिशतले घट्ने पनि परीक्षणबाट पुष्टि भइसकेको छ ।