सिकेका कार्यकर्ताले डाक्टरमाथि हात हालेपछि चिकित्सक संघ भड्कियो

सिके राउत नेतृत्वको जनमत पार्टीका कार्यकताले जलेश्वर अस्पतालका मेडिकल सुपरिटेन्डेन्ट सतिश साहमाथि हातपात गरेको घटनाप्रति सरकारी चिकित्सक संघले भर्त्सना गरेको छ । संघले आज बिज्ञप्ति प्रकाशित गर्दै घटनाका दोषीलाई कारबाही गर्न पनि सरकारसंग माग गरेको छ ।

अस्पतालको गाडीमा सवार रहेका साहमाथि हिजो जनमत पार्टीका कार्यकर्ताहरुले आक्रमण गरेका थिए । गाडीको झ्यालको सिसा फुटाएर ज्यानै लिने गरि सिकेका कार्यकर्ताले आक्रमण गर्दा साहको टाउकोमा आठ वटा टाका लगाइएको थियो ।

संघले डाक्टरमाथिको यो आक्रमणले राजनीतिका नाममा व्याप्त रहेका असामाजिक तत्त्वहरूलाई नङ्ग्याइदिएको बताएको छ । ‘चिकित्सकलगायत स्वास्थ्यकर्मीको सबैभन्दा बढी महत्त्व रहेको यस महामारीको घडीमा चिकित्सक, स्वास्थ्यकर्मीलगायत सम्पूर्ण राष्ट्रसेवकको मनोवल घटाउने खालको गतिविधिले सबैलाई स्तब्ध तुल्याएको छ’, संघले भनेको छ ।

चिकित्सकमाथि आक्रमण गर्नेलाई मानव अधिकार हनन्, ज्यान मार्ने प्रयास र अत्यावश्यक सेवामा अवरोधको मुद्दा चलाउन संघले माग गरेको छ । साथै घटनाका दोषीलाई नियमानुसार गैरजमानती हिरासतमा खारेर कडा कारवाही गर्न सरकारलाई भनेको छ ।

माग पूरा नभएमा थप विरोधका कार्यक्रम ल्याउने चेतावनी संघले दिएको छ ।