बोरामा गाँजा बोक्नेको भागाभाग

प्रहरीले मकवानपुरबाट एक क्विनटल गाँजासहित एक युवकलाई समातेको छ । राक्सिराङ गाउँपालिका-५ का ३६ वर्षीय रामकुमार प्रजालाई हिजो राति प्रहरीले समातेको हो ।

ठाडेचुरीबाट घट्टे खोलातर्फ जाँदै गरेका पाँच जना मानिसहरु पिठ्युमा बोरा बोकी हिँडिरहेको अवस्थामा प्रहरी कार्यालय मनहरीले देखेको थियो । सोही क्रममा भाग्न खोज्दा उनीहरुमध्ये रामकुमारलाई नियन्त्रणमा लिई बोरा जाँच गर्दा उक्त परिमाणको लागूऔषध फेला परेको प्रहरीले बताएको छ ।

उनीसँगै रहेका अन्य चार जना फरार छन् । अहिले उनीहरुको खोजीकार्य भईरहेको प्रहरीले जनाएको छ ।