भारतीय ग्यास बुलेटको ठक्करबाट ‘जेठा दाइ’ को निधन

हेटौंडाको चर्चित चिया अड्डा जेठा दाइको चिया पसलका सञ्चालक बुध्दिबहादुर श्रेष्ठ ‘जेठा दाइ’ को सवारी दुर्घटनामा निधन भएको छ । उहाँले अढाई दशकदेखि निरन्तर सीमाचोक आसपासका क्षेत्रमा चिया पसल सञ्चालन गर्नु भएको थियो ।

पश्चिम मकवानपुरको मनहरीबाट हेटौंडा जाने क्रममा हेटौंडा १९ नेवारपानीमा भारतीय ग्यास बुलेटको ठक्करबाट निधन भएको हो ।

जिल्ला प्रहरी कार्यालयका अनुसार मनहरीबाट हेटौंडातर्फ जाँदै गरेको बागमती प्रदेश ०३–००२ प ६८८० नम्बरको स्कुटरलाई सोही दिशाबाट आउँदै गरेको एनएल–०१ एन २९९९ नम्बरको भारतीय नम्बर प्लेटको ग्यासबुलेटले ठक्कर दिएको मकवानपुर प्रहरीले जानकारी दिएको छ ।

“चिया बेचेरै जेठा दाइले हेटौंडामा घर ठड्याउनु भएको थियो भने परिवारको पालनपोषण र शिक्षादीक्षा दिलाउनुभएको थियो ।”

ठक्करबाट गम्भीर घाइते भएका जेठा दाइलाई उपचारार्थ हेटौँडा ११ स्थित चुरेहिल अस्पताल लगिएकोमा चिकित्सकले मृत घोषित गरिदिएका थिए । ठक्कर दिने ग्यास बुलेट प्रहरीको नियन्त्रणमा छ भने चालक फरार छन् । जेठा दाइ मनहरीस्थित आफन्तका घरमा पुगेर हेटौंडा फर्कने क्रममा उक्त दुर्घटना भएको हो ।

लामो समयसम्म चिया र नास्ता व्यवसाय गर्नुभएका श्रेष्ठको चिया पसल साँघुरो गल्लीमा छ । उक्त चिया पसलमा विभिन्न राजनीतिक दलका नेता,पूर्वमुख्यमन्त्री, संविधानसभा सदस्य,सांसदहरु, प्रदेश सभा सदस्य तथा पत्रकारहरुको बाक्लो उपस्थिति हुने गर्थ्यो ।

चिया बेचेरै जेठा दाइले हेटौंडामा घर ठड्याउनु भएको थियो भने परिवारको पालनपोषण र शिक्षादीक्षा दिलाउनुभएको थियो । मकवानपुर उद्योग वाणिज्य संघबाट उहाँ गत वर्ष साना व्यवसायीको रुपमा सम्मानितसमेत हुनुभएको थियो ।