चोरीको पैसामा मोज गर्ने भिक्षुणी जेल चलान

अमेरिकामा जुवा खेलमा सहयोग गर्ने र खर्चालु ढंगले बिदा मनाउन ८ लाख डलर रकम चोरी गर्ने एक बृद्ध भिक्षुणीलाई जेल सजाय तोकिएको छ । क्यालिफोर्नियाकी ८० वर्षीया म्यारी मार्गरेट क्रिउपरलाई त्यहाँको अदालतले सो सजाय सुनाएको हो ।

क्रिउपरले ६ दशकअघि गरिबको जीवनप्रति समर्पण गर्ने कसम खाएकी थिइन् । तर, लस ऐन्जल्सस्थित रोमन क्याथोलिक प्राथमिक विद्यालयको प्राध्यापकको रुपमा उनले ८ लाख ३५ हजार डलर लस भेगासमा जुवा खेल्न जुटाएको अदालतले फैसला गरेको छ ।

सो रकमबाटै उनले लेक टाहोइलगायतका महंगा रिसोर्टमा विलासीपूर्ण यात्रामा खर्च गरेको जनाइएको छ ।

गत वर्षको सुनुवाईको क्रममा क्रिउपरले कालो धनलाई बैध बनाएको र ठगी गरेको स्वीकार गरेकी थिइन् ।

टिउसन र धर्मदानका लागि विद्यालयमा पठाइएको रकम क्रिउपरले नियन्त्रणमा राखेको गोप्य अकाउन्टमा कसरी पुग्यो भन्दै अदालतमा उनीविरुद्ध उजुरी परेको थियो । एउटा अडिटले उनका गोप्य योजना सार्वजनिक गरिदिने धम्की दिएपछि क्रिउपरले आपत्तिजनक कागजात नस्ट गर्न कर्मचारीहरुलाई अनुरोध गरेको अदालतको फैसलामा उल्लेख छ ।

दी टाइम्सका अनुसार उनको आर्थिक अनियमितताबारे सुरुमा लस एन्जलसका धर्माध्यक्षसँग विवाद भएपछि भिक्षुलाईभन्दा पादरीलाई धेरै पैसा दिइने गरेको भन्दै रकम उठाउन आफू योग्य भएको तर्क गरेकी थिइन् ।