सीमापारबाट किन ल्याइयो बण्डलका बण्डल हजारका नक्कली नोट ?

सशस्त्र प्रहरीको गोलगञ्ज बिओपीले नक्कली नोटसहित एक किशोरलाई समातेको छ । बाराको सिम्रौनगढ नगरपालिका-६ अम्मरपुर सीमा क्षेत्रबाट सशस्त्रको टोलीले एक हजार दरका ३ बन्डल नक्कली नोटसहित धनुषाका वीरेन्द्र महतोलाई समातेको हो ।

सीमा क्षेत्रबाट नहरतर्फ आउँदै गरेको मोटरसाइकललाई रोकेर चेकजाँच गर्दा धनुषाको छिरेश्वर-५ दिगम्बरपुरका १९ वर्षीय महतोको साथबाट उक्त नक्कली नोट फेला परेको सशस्त्रले जनाएको छ ।

सशस्त्रको गोलगञ्ज बाहिनी स्क्वायड टिमले जनआस्थालाई दिएको जानकारीअनुसार लु ७८ प २३९७ नम्बरको मोटरसाइकलमा आएका महतोको साथबाट १ हजार दरका ३ सय १ वटा नक्कली नोट सहित उनलाई पक्राउ गरिएको हो ।

पक्राउ परेका महतोको साथबाट पन्ध्र सय २५ सक्कली नोट तथा मोटरसाइकल बरामद भएको छ । उनलाई गोलागञ्ज बिओपीमा ल्याएर थप कारवाहीका लागि नेपाल प्रहरीमा बुझाउने प्रकृया अघि बढाइएको सशस्त्रको भनाई छ ।