माओवादीले विकल्प खुला राखेर चुनावी तालमेलका लागि कार्यदल बनाउने

सत्तारुढ नेकपा माओवादी केन्द्रले आगामी स्थानीय तह निर्वाचनलाई लक्षित गरेर अन्य दलहरुसँग सिट तालमेलबारे समझदारी जुटाउने कार्यदल बनाउने भएको छ ।

आज काठमाडौंमा सम्पन्न केन्द्रीय समिति बैठकले गठबन्धनसहित निर्वाचन जाने विषयमा टुंगो लगाउन कार्यदल बनाउने निर्णय गरेको हो ।

माओवादीले चुनाव तयारी समिति पनि बनाएको छ । चुनावमा एकल वा गठबन्धन दुवै सम्भावना खुला राखेर तयारीमा जुट्ने निर्णय भएको केन्द्रीय सदस्य वर्षमान पुन अनन्तले जानकारी दिनुभयो ।

‘आफ्नै एकल शक्तिमा निर्वाचनमा जाने तयारी गर्ने र गठबन्धन भएमा राम्रो, नभए आफैं लड्ने तयारी गर्ने निर्णय भएको छ’, नेता पुनले भन्नुभयो, ‘सबै पालिका र वडासम्मका लागि निर्वाचन तयारी समिति बनाइसकेको र गठबन्धनसँग तालमेलका लागि निर्णय गर्ने अनि त्यसरी नै तालमेल हुने छ ।’

उहाँका अनुसार हरेक पालिकामा लोकप्रिय र योग्य उम्मेदवारको सूची बनाएर पठाउने, त्यही सिफारिसअनुसार उम्मेदवार बनाउने पार्टीको तयारी छ ।

माओवादीले आगामी चुनावमा तालमेल गर्ने बताइरहँदा सत्ता गठबन्धनको अर्को दल नेपाली काँग्रेसमा भने गठबन्धनसहित चुनावमा जाने विषयमा शीर्ष नेताहरुनै विभाजित छन् ।