इ-सेवाविरुद्ध अदालतमा मुध्दा दर्ता

उपभोक्तालाई ठगेको आरोपमा इ-सेवाविरुद्ध काठमाडौं जिल्ला अदालतमा मुद्दा परेको छ । इ- सेवाले विभिन्न बहानामा आफ्नो रकम होल्ड गरेर उपभोक्ता अधिकारको हनन गरेको भन्दै अधिवक्ता तीर्थराज भट्टराईले मुद्दा हालेका हुन् ।

भट्टराईका अनुसार होल्ड भएको रकम इ-सेवालाई बारम्बार फलोअप गरेर मुस्किलले दुई महिनामा फिर्ता भएको थियो । इ- सेवाको अकर्मण्यताका कारण रकम होल्ड हुनु उपभोक्ता अधिकारविरुद्द भएको र त्यसबाट आफूलाई नोक्सान पुगेको उनको दाबी छ ।

त्यसविरुद्ध मनासिब क्षतिपूर्ति माग गर्दै इ- सेवालाई लिगल नोटिससमेत पठाएका उनले राष्ट्र बैंकमा पनि उजुरी दिएका थिए । तर, कतैबाट पनि गुनासो सुनुवाई नभएको भन्दै अधिवक्ता भट्टराईले अदालत जानु परेको बताएका छन् । क्षतिपूर्तिको मागसहित आज इ- सेवाविरुद्द जिल्ला अदालतमा मुद्दा दर्ता गराएको उनले बताए ।

इ- सेवाले विभिन्न बहानामा यसरी रकम होल्ड गर्ने कुरा अहिले सामान्यजस्तै भइसकेको भन्दै उनले यसबाट धेरै प्रयोगकर्ता पीडित भएको दाबी पनि गरेका छन् ।

इ-सेवाका समग्र प्रयोगकर्ताको उपभोक्ता अधिकारको संरक्षण तथा उपभोक्ता सचेतना वृद्धि गराउनका साथै गलत गर्नेले कानूनको अभावमा आफ्नो दायित्वबाट उन्मुक्ति नपाउने अवस्थाका लागि मुद्दा दर्ता गराएको पनि अधिवक्ता भट्टराईले बताए ।