भन्सार एजेण्टको परीक्षा मिति तोकियो

पटक पटक स्थगित गरिएको भन्सार एजेण्टको परीक्षा मिति तोकिएको छ । भन्सार विभागका अनुसार आगामी बैशाख १७ गते शबिारका दिन दिउँसो २ बजेदेखि परीक्षा सञ्चालन हुनेछ ।

उच्च अदालत पाटनले यसअघि परीक्षा स्थगन गर्न दिएको अल्पकालीन अन्तरिम आदेशलाई निरन्तरता नदिने निर्णय गरेपछि परीक्षाको नयाँ मिति तोकिएको विभागले जनाएको छ । विभागले परीक्षा केन्द्र भने पछि सार्वजनिक गर्ने बताएको छ ।

उच्च अदालत, पाटनको गत फागुन २६ गतेको आदेशबमोजिम फागुन २७ गतेकोे परीक्षा स्थगित गरिएको थियो । हालसम्म तीन पटक परीक्षा स्थगित भइसकेको छ ।

सीमानाकामा भन्सार जाँच पासका लागि भन्सार एजेन्टहरुको संख्या कम भएपछि सरकारले गत वर्ष छ सय भन्सार एजेन्ट थप गर्ने निर्णय गरेको थियो । गत जेठमै परीक्षा गर्ने भनिए पनि विविध कारणले हुन नसकेको हो ।