चितवन मेडिकल कलेजमाथि गम्भीर आरोप, छानबिन गर्दै स्वास्थ्य मन्त्रालय

सरकारले कोरोना संक्रमितलाई निःशुल्क उपचार गर्ने भने पनि चितवन मेडिकल कलेज (सीएमसी) ले बिरामीसँग रकम असुलेको आरोप लाग्दै आएको छ । सबैले कोरोनाको उपचार पाउन् भनेर स्वास्थ्य तथा जनसंख्या मन्त्रालयले गरेको निर्णयलाई चितवन मेडिकल कलेजले आफ्नो कमाइ खाने भाँडो बनाएको त्यहाँबाट डिस्चार्ज भएका कतिपय बिरामीले बताएका छन् ।

मन्त्रालयले तोकेका अस्पतालमा कोरोनाको निःशुल्क उपचार बिरामीमा कोभिड पुष्टि भएको हुनुपर्दछ । संक्रमण पुष्टि भएकाहरु उपचारका निमित्त तोकेको अस्पताल गएमा उनीहरुले बिरामीको निःशुल्क चेकजाँच गर्नुपर्ने व्यवस्था सरकारले गरेको हो । तर, सिएमसीले कोभिड पुष्टि भएकाहरुसँग पनि रकम असुलेर सरकारसँग समेत शोधभर्ना गरेको स्थानीयले आरोप लगाएका हुन् ।

सिएमसीले कोभिडका बिरामीसँग मनलाग्दी रकम असुल गरे पनि सरकार मुकदर्शक बनेको स्थानीयको भनाइ छ । उपचार शुल्क तिर्न नसकेर एकाध बिरामीको ज्यान समेत गएको चितवनवासीले नै जनाएका छन् । अस्पतालले भनेको जति शुल्क तिर्न सक्नेले मात्र उपचार पाएको उनीहरुको ठहर छ ।

सिएमसीले बिरामीसँग कोभिड उपचारको शुल्क उठाएपछि स्वास्थ्य मन्त्रालयमा फर्जी बिल बनाएर पठाएको विवरण जनआस्थाले प्राप्त गरेको हो । सिएमसीले पछिल्लो समयमा गरिएको उपचारको निम्ति झण्डै १५ करोड रुपैयाँको फर्जी बिल बनाएर मन्त्रालय पठाएको दाबी छ । बिरामीले आफ्नै खर्चमा कोभिडको उपचार गराए पनि विभिन्न बहाना बनाएर सिएमसीले मन्त्रालयबाट रकम निकासा गर्न खोजिरहेको स्रोतको दाबी हो ।

जिल्ला प्रशासन कार्यालय चितवनका प्रमुख जिल्ला अधिकारी र सिएमसीको मिलोमतोमा फर्जी बिल बनाएर स्वास्थ्य मन्त्रालय पठाइएको आरोप लागेको छ । उनीहरुले यस विषयमा सम्बन्धित निकायले छानबिन अघि बढाउनुपर्ने मागसमेत राखेका छन् । स्थानीयले आरोप लगाइरहँदा अस्पतालले भने उक्त आरोपमा कुनै सत्यता नभएको जनाएको हो ।

थाहा नहुनुञ्जेल पैसा लिएका हौः अस्पताल

चितवन मेडिकल कलेजका निर्देशक हरिशचन्द्र न्यौपानेले यी सब कुरा झुठो भएको दाबी गरेका छन् । निर्देशक न्यौपानेले सुरुमा कोरोनाको उपचारवापत खर्च लिएको बताए । तर, स्वास्थ्य मन्त्रालयको निर्णय र निर्देशनपछि अस्पतालले कोभिड पुष्टि भएका बिरामीसँग एक रुपैंया पनि नलिएको बताए ।

कोभिड पुष्टि भएको बिरामीको विवरण राख्न आइएमयु एप बनाइएको र उक्त एपमा सम्पूर्ण बिरामीको विवरण यथावत् राखिएको निर्देशक न्यौपानेको दाबी छ । ‘कसैले फर्जी बिल बनाएको पुष्टि गरोस्, म सबै रकम फिर्ता गरिदिन्छु,’ उनले झोक्किएर भने ।

मसँग सरोकार नभएको विषय होः प्रशासन

जिल्ला प्रशासन कार्यालय चितवनका प्रमुख जिल्ला अधिकारी आस्मान तामाङले उक्त विषयले आफूसँग सरोकार नराख्ने बताए । साथै, उनले आफ्नो र अस्पतालको मिलोमतो भएको कुरोलाई झुठो दाबी भनेका छन् । स्थानीय बचाउन कोभिडको समयमा घरघरमा खटेको व्यक्तिमाथि यसरी आरोप लगाउनु अन्याय भएको उनी बताँछन् ।

साथै, प्रमुख जिल्ला अधिकारीले सिएमसीले शुल्क लिएको भन्ने विषय पहिले पनि उठान भइसकेको र छानबिनका लागि डीसीएमसीको निर्णयसहित राष्ट्रिय पत्रिकामा आह्वान गरिएको जानकारी दिए । राष्ट्रको सम्पत्ति बचाउनु सबैको दायित्व भएको र कुनै पनि हालतमा यसको दुरुपयोग हुन नदिने प्रजिअ तामाङको दाबी छ ।

छानबिन अघि बढाइन्छः स्वास्थ्य मन्त्रालय

स्वास्थ्य मन्त्रालयका सहायक सूचना अधिकारी समीर अधिकारीले सिएमसी अस्पतालमाथि छानबिन अघि बढाइने जानकारी दिएका छन् । अस्पतालले पठाएको हरेक बिलको पुष्टि हुनुपर्ने उनको भनाइ छ । ‘यदि अस्पतालले फर्जी बिल बनाएर पठाएको रहेछ भने त्यसलाई कानुनअनुसार कारबाही गरिने छ,’ उनले भने । साथै, अस्पतालले कुनै पनि हालतमा दोहोरो रकम नपाउने स्वास्थ्य मन्त्रालयले जनाएको छ ।