खोलामा डुबेका बालकका परिवारद्वारा राजमार्ग ठप्प

हिजो दिउँसो खोलामा पौडी खेल्ने क्रममा एक जना बालकको मृत्यु भएको विषयलाई लिएर विपी राजमार्गअन्तर्गत सिन्धुली खण्ड बन्द गरिएको छ । बालकका नातेदारले दोषीलाई कारबाहीको माग गर्दै बिहानैदेखि राजमार्गमा टायर बालेर यातायात बन्द गराएका छन् ।

उनीहरुले कमलामाई नगरपालिका–४ को ढुङ्ग्रेबासमा टायर बाल्दै अवरोध गरेका छन् । पीडित पक्षलाई छलफलको निम्ति बोलाए पनि नआएको र सडकमा टाएर बालेर राजमार्ग बन्द गराएको सिन्धुली जिल्ला प्रहरी कार्यालयले जनाएको छ ।

हिजो दिउँसो फिक्कल गाउँपालिका–१ का १२ वर्षीय श्रीयास भुजेलको ग्वाङखोलामा पौडी खेल्ने क्रममा डुबेर मृत्यु भएको थियो । कमलामाई नगरपालिका–४ र ६ वडा जोड्ने ग्वाङखोलामा पुल निर्माणको लागि खनिएको खाल्डोमा जमेको पानीमा डुबेर भुजेलको मृत्यु भएपछि आफन्त र थानीयवासीले शंकास्पद मृत्यु भनेका छन् ।

हिजो दिउँसो निधन भएका बालकको शव घटनास्थलमै छ । परिवारले शव बुझ्न मानेका छैनन् । उनी स्थानीय जनता आवासीय माध्यमिक विद्यालयमा कक्षा ४ मा अध्ययनरत थिए ।