सुख्खा पहिरोमा पुरिएका हिस्कीको लास भेटियो

पाल्पामा सुख्खा पहिरोले पुरिएर एक वृद्धको ज्यान गएको छ । तिनाउ गाउँपालिका-१ कचलस्थित कचलफाँट सिचाई आयोजनाको नहरमा मंगलबार दिउँसो खसेको सुख्खा पहिरोमा वेपत्ता भएका स्थानीय ६५ बर्षीय वृद्ध डिलबहादुर हिस्की आज मृत अवस्थामा फेला परेका हुन् ।

मृतक हिस्कीको शव आज बिहान ९ देखि १० बजेको आसपासमा फेला परेको तिनाउ गाउँपालिकाका अध्यक्ष ओमबहादुर घर्ती मगरले जानकारी दिए । हिस्कीसहित अन्य व्यक्ति नहरमा गएका बेला अचानक माथिबाट धुलो पहिरो खसेको थियो । पहिरो खसेपछि भागाभाग भएको थियो । अरुले भागेर ज्यान जोगाए पनि हिस्की भने पुरिएका थिए ।

मृतक हिस्किको शव पोष्टमाटमका लागि लुम्बिनी प्रादेशिक अस्पताल बुटवल पठाइएको छ । गत वर्ष पनि कचलफाँट सिँचाई आयोजना अन्तरगत नहर खन्ने क्रममा सोही ठाउँमा जेसीबी पुरिएको थियो । उक्त डोजर एक बर्षपछि मात्रै निकालिएको थियो ।