काभ्रेपलाञ्चोकमा सवारी दुर्घटना, कम्तिमा ५ जनाको मृत्यु

काभे्रपलाञ्चोक जिल्लामा केही बेरअघि भएको सवारी दुर्घटनामा पाँच जनाको मृत्यु भएको छ । काठमाडौंबाट भारतको उत्तरप्रदेशतर्फ गएको युपी ५७ टी ८१८१ बस र सिन्धुलीबाट काठमाडौंतर्फ आउँदै गरेको ना. १ ज ४२१० नम्बरको टाटासुमो रोशी गाउँपालिका ११ मा ठोक्किँदा उक्त दुर्घटना भएको हो ।

जिल्ला प्रहरी कार्यालय काभ्रेपलाञ्चोकका अनुसार बसमा सवार भारतीय तीर्थयात्रीहरु काठमाडौंमा पशुपतिनाथ दर्शन गरेर घर फर्कंदै थिए । मृतकमध्ये अधिकांश टाटा सुमोका यात्रु रहेको बुझिएको छ ।

दुर्घटनामा कमलामाई नगरपालिका ७ सिन्धुलीका २९ वर्षीय विक्रम श्रेष्ठ, रामेछापको खाँडादेवी ८ का ७ वर्षीया संगीता भुसाल र उनकी आमा २९ वर्षीया सम्झना भुसाल, सिन्धुलीको सुनकोशी गाउँपालिका १ का ४४ वर्षीय प्रमिला नेपाली र कमलामाई नगरपालिका ४ सिन्धुलीका ४० वर्षीय हरिबहादुर बलको घटनास्थलमा मृत्यु भएको हो ।

दुर्घटनामा डेढ दर्जन बढी घाइते भएका छन् । दुर्घटनामा ठक्कर खाएका दुवै सवारी साधन क्षतिग्रस्त भएको छ ।