उदयपुरमा ट्रक दुर्घटना, ४ जनाको मृत्यु

उदयपुरमा ट्रक दुर्घटना हुँदा चार जनाको घटनास्थलमै मृत्युु भएको छ । कटारी नगरपालिका–१४, भदौरेमा गएराति ट्रक दुर्घटना हुँदा चार जनाको मृत्यु भएको हो ।

राति साढे २ बजेतिर ट्रक सडकबाट एक सय मिटर तल खसेको ट्राफिक प्रहरी कार्यालय इटहरीले जनाएको छ ।

हेटौंडाबाट सोलुमा निर्माणाधीन हाइड्रोपावरको सिमेण्ट बोकेर जाँदै गरेको ना.८ख ८२९७ नम्बरको ट्रक सिद्धिचरण लोकमार्गअन्तर्गत कच्ची सडकखण्डमा दुर्घटना भएको हो ।

ट्राफिक प्रहरी कार्यालय इटहरीका प्रहरी सहायक निरीक्षक विद्यानन्द चौधरीका अनुसार दुर्घटनामा ट्रक चालक सिमरा–१ का ३५ वर्षीय सुजित घलान, सहचालक २५ वर्षीय नितेश खड्का, ट्रकमा सवार सिमरा–१ का १७ वर्षीय अनुज लामा र ३७ वर्षीय राजन तामाङको मृत्यु भएको छ ।